Telegram’да тез эсда қоладиган фойдаланувчи исмларини сотиш бўйича аукционлар бўлиб ўтадиган платформа пайдо бўлиши мумкин. Бу ҳақда мессенжер асосчиси Павел Дуров ўз Telegram-каналида маълум қилди, деб ёзади Meduza.
«Агар биз аукционга олдиндан банд қилиб қўйилган фойдаланувчи исмларини, гуруҳлар ва каналларга ҳаволаларни қўйсак, Telegram ўзининг 700 миллион фойдаланувчиси билан қанчалик даражада муваффақиятли бўлиши мумкин эди, тасаввур қилинг. @storm ёки @royal каби миллионлаб тез эсда қолувчи t.me-манзилларга қўшимча равишда барча тўрт ҳарфли фойдаланувчи исмлари (@bank, @club, @game, @gift) ҳам сотилиши мумкин бўларди», — деб ёзди Дуров.
Telegram экотизимининг бошқа унсурлари, шу жумладан, стикерлар ёки эмодзилар ҳам сотувга қўйилиши мумкин бўлади. Фойдаланувчилар смарт-шартномалар орқали ҳимояланган олди-сотди битимлари билан уларни бир-бирига бериши мумкин бўларди.
«Келинг, Telegram’га яқин ҳафталар ичида бироқ Web 3.0 қўша олармиканмиз, кўрамиз», — дея қўшиб қўйди Telegram асосчиси.
Дастлаб у фойдаланувчиларга унинг постига реакциялар қолдириш имкониятини берди. Пост 21,3 мингдан ортиқ дизлайк ва қарийб 6,5 мингта лайк тўплаганидан кейин Дуров реакцияларни бекитиб қўйди.
Июнь ойида Telegram’да пулли обуна пайдо бўлди, унинг нархи мамлакатга қараб ойига 4,99 ёки 5,69 еврога тенг.
Пулли обуна Telegram’даги баъзи чекловларни айланиб ўтиш имконини берди, хусусан, файлларни тезроқ юклаб олиш, рекламани ўчириш, овозли хабарларни матнга айлантириш, каналларга 1000 тагача обунани расмийлаштириш ва 10 тагача чатни бириктириш.
Августда Telegram пулли обуна функцияларини кенгайтирди. Энди у суҳбатдошларга овозли ва видеоли хабарларни юборишни тақиқлаш имкони беради.
Павел Дуровнинг айтишича, агар фойдаланувчиларнинг 2,5—3 фоизи пулли обунани расмийлаштирса, мессенжер ўзининг барча харажатларини қоплайди.
Изоҳ (0)