АҚШ Марказий Осиё мамлакатлари иқтисодиётини тиклаш бўйича ташаббусларни қўллаб-қувватлайди

Ўзбекистон элчиси Жавлон Ваҳобов АҚШ Давлат котибининг Жанубий ва Марказий Осиё бўйича ёрдамчиси Дональд Лу билан учрашди, деб хабар бермоқда «Дунё» ахборот агентлиги.

Қайд этилишича, мулоқот давомида Ўзбекистон—Америка ҳамкорлигига оид қатор долзарб масалалар, аввал эришилган келишувларни амалга ошириш ва бўлажак қўшма тадбирларнинг жадвали муҳокама қилинган. Томонлар, шунингдек, сиёсий, дипломатик, савдо-иқтисодий, сармоявий соҳаларда ҳамда минтақавий ҳамкорлик доирасидаги ҳамкорликни чуқурлаштиришга алоҳида эътибор қаратган. Кадрлар салоҳиятини ривожлантириш бўйича қўшма дастур ва ташаббусларни кенгайтириш имкониятлари ҳам кўриб чиқилган.

Америка вакили Шавкат Мирзиёевнинг ташқи сиёсий фаолиятини юқори баҳолаган. Дональд Лу АҚШнинг иқтисодий ўзаро боғлиқликни кенгайтириш, озиқ-овқат хавфсизлигини мустаҳкамлаш ва Марказий Осиё мамлакатлари иқтисодиётини тиклаш бўйича ташаббусларини ҳар томонлама қўллаб-қувватлашини яна бир бор таъкидлаган.

Америкалик дипломат жорий йил 20—23 август кунлари Конгрессдаги «Ўзбекистон бўйича кокус» ҳамраиси, Миссисипи штатидан республикачи конгрессмен Трент Келли бошчилигидаги АҚШ Конгресси делегациясининг Тошкентга ташрифига тўхталган. Унинг сўзларига кўра, 2017 йилдан буён АҚШ Конгресси аъзоларининг Ўзбекистонга еттинчи сафари бўлган америкалик қонунчиларнинг ушбу ташрифи икки давлат ўртасидаги парламентлараро ҳамкорликнинг юқори ўсувчанлигидан далолат беради.

Томонлар Ўзбекистон ва АҚШ инфратузилма, энергетика, транспорт, атроф-муҳитни муҳофаза қилиш ва иқлим ўзгаришига қарши курашиш соҳаларида аниқ натижаларга эришиш учун C5+1 формати доирасидаги ҳамкорликни давом эттириш тарафдори эканини таъкидлаган.

Учрашув якунида томонлар икки томонлама ва минтақавий шериклик соҳасидаги ҳамкорликда эришилган муваффақиятларни қайд этган. Шунингдек, бир-бирининг манфаатларини ҳисобга олиш тамойиллари асосида конструктив мулоқотни фаол ривожлантиришга тайёр эканини билдирган.