Rossiya davlat dumasi sobiq deputati Ilya Ponomaryov Darya Duginani qandaydir “Milliy respublika armiyasi” o‘ldirganini ma’lum qildi, deb yozadi TV Net.
Ilya Ponomaryovning aytishicha, “ushbu aksiya, so‘nggi oylarda Rossiya hududida amalga oshirilgan boshqa ko‘plab partizanlik aksiyalari kabi ‘Milliy respublika armiyasi’ tomonidan amalga oshirilgan. Biz Rossiyada kuchayib borayotgan qarshilik to‘lqinini yoritib boruvchi ‘Rospartizan’ manbamiz yordamida uning jangchilari bilan aloqa o‘rnatdik. MRA jangchilari menga bugun ularning murojaatini o‘qib eshittirish vakolatini berdi”.
Shundan keyin Ponomaryov tashkilot murojaatini e’lon qildi, u hokimiyatga aloqador barcha rossiyaliklarga qarshi terror e’lon qilishni nazarda tutadi.
Bundan tashqari, Ponomaryov aniqlik kiritishicha, aloqaga chiqqan partizanlar mashinada Darya Duginadan tashqari, uning otasi ham bo‘lishini kutgan. Muxolifatchining so‘zlariga ko‘ra, mashinani portlatish uchun tanlangan sana ham tasodifiy emas — “roppa-rosa bir yil avval Dugin o‘ldirish kerakligi haqida tvit yozgandi”.
Eslatib o‘tamiz, rossiyalik jamoat arbobi, siyosatshunos Aleksandr Duginning qizi Darya haydab ketayotgan Land Cruiser Prado avtomobili 20-avgust kuni kechqurun Moskva xalqa avtomobil yo‘lidan taxminan 25 km masofada portlab ketdi. Darya voqea joyida halok bo‘lgan.
Zaporojye viloyati harbiy-fuqarolik ma’muriyati a’zosi Vladimir Rogov va DXR rahbari Denis Pushilin hodisada “ukrainalik terrorchilar” qo‘li borligini, ular aslida Aleksandr Duginni nishonga olganini aytdi.
Rossiya Tashqi ishlar vazirligi vakili Mariya Zaxarova voqea yuzasidan izoh berar ekan, agar qotillikda “Ukrainaning qo‘li borligi” haqidagi versiya vakolatli organlar tomonidan tasdiqlansa, “Kiyev tomonidan amalga oshirilayotgan davlat terrorizmi siyosati” haqida gapirish kerak bo‘lishini aytdi.
Ukraina prezidenti ofisi hodisaga aloqadorligini rad etmoqda.
Ilya Ponomaryov 2016-yil 10-iyungacha Rossiya Davlat dumasi deputati bo‘lgan. 2019-yil mayida o‘sha paytdagi prezident Pyotr Poroshenko Ponomaryovga Ukraina fuqaroligini taqdim etgan. Ponomaryov 2014-yil martida Qrimning Rossiyaga qo‘shilishiga qarshi chiqqan yagona rossiyalik deputat bo‘lgan.
Izoh (0)