Afg‘onistonda suv toshqini sabab o‘nlab odamlar halok bo‘ldi. “Tolibon” jahon hamjamiyatidan jabrlanganlar uchun yordam so‘ramoqda

Afg‘onistonning bir qancha viloyatlari suv toshqinlaridan jiddiy zarar ko‘rdi. Tabiiy ofat oqibatida 35 kishi halok bo‘ldi, 65 kishi yaralandi, deb xabar bermoqda “Kommersant” Kabul News’ga tayanib. “Tolibon” jahon hamjamiyatidan jabrlanganlarga yordam ko‘rsatishni so‘ramoqda.

“Biz xalqaro hamjamiyatdan, ayniqsa, islomiy davlatlardan, xayriya va gumanitar tashkilotlardan yaqinda sodir bo‘lgan suv toshqini oqibatida jabr ko‘rganlarga yordam berish uchun shoshilinch choralar ko‘rishni va ushbu muhim pallada hamkorlik qilishdan bosh tortmaslikni so‘raymiz”, — deyiladi “Tolibon” hukumati bayonotida.

Suv toshqinlari oqibatida mamlakatda 3000 ga yaqin turar joy binosi vayron bo‘lgan. Minglab qishloq xo‘jaligi yerlari zarar ko‘rgan. Hukumat barcha tegishli mutasaddi va idoralarga jabrlanganlarga yordam berish bo‘yicha ko‘rsatmalar bergan.

Avvalroq Hindistonda musson yomg‘irlari sabab yuzaga kelgan suv toshqinlari hamda ko‘chkilar oqibatida kamida 50 kishi halok bo‘lgan edi.

Mavzuga doir: Xitoyning g‘arbiy qismidagi suv toshqini oqibatida 17 kishi halok bo‘ldi (video)