Litva hududiy suvlarida 22—26-avgust kunlari Litva, Latviya, Estoniya va Chexiya harbiy xizmatchilari ishtirokida “Boltiq bikini — 2022” xalqaro harbiy-havo kuchlari mashg‘ulotlari o‘tkaziladi. Bu haqda Litva armiyasiga tayanib, “Interfaks” xabar berdi.
Mashg‘ulotlar ishtirokchilari aviahalokatlar yuz berganda qo‘llaniladigan turli protseduralarni ishlab chiqadi, parvoz ekipaji esa bunday favqulodda vaziyatda qanday qilib to‘g‘ri harakatlanishni o‘rganadi hamda suvdagi samolyotdan omon qolish bo‘yicha malakasini oshiradi, deyiladi xabarda.
“Boltiq bikini” xalqaro mashg‘ulotlari 2004-yildan beri har yili Boltiqbo‘yidagi uchta davlatdan birida o‘tkazib kelinmoqda.
22-avgust kuni Janubiy Koreya va AQSH keng ko‘lamli qo‘shma harbiy mashg‘ulotlarni boshladi. Mashg‘ulotlar 1-sentabrga qadar davom etadi va kutilmagan vaziyatlarda harakatlarni ishlab chiqishni o‘z ichiga oladi. Xususan, Shimoliy Koreya hujumlarini qaytarish va katta Seul tumanini himoya qilish ko‘zda tutilgan, shundan so‘ng qarshi hujum amaliyotlari o‘tkaziladi.
Izoh (0)