Pokistonning sobiq bosh vaziri Imron Xonga terrorizm bo‘yicha ayblov qo‘yildi (video)

Pokistonning sobiq bosh vaziri Imron Xonga nisbatan terrorizmga qarshi qonun bo‘yicha jinoyat ishi ochildi.

Pokiston ichki ishlar vazirining Twitter’da yozishicha, Imron Xon “politsiya xodimlariga tahdid qilgani va ularni haqorat qilgani uchun qonun oldida javob berishi kerak”.

Xon shanba kungi mitingda o‘z yordamchisi hibsga olingani va qiynoqqa solingani sababli politsiya xodimlarini tanqid qilgan edi.

“Islomobod bosh inspektori va bosh inspektor o‘rinbosari, biz sizni ayamaymiz, sizga qarshi da’vo arizasi kiritamiz. Shuningdek, sudya Zeba Chaudri, siz ham tayyor bo‘ling, chunki biz sizga ham qarshi chora ko‘ramiz. Barchangiz uyalishingiz kerak”, — degan Imron Xon.

Pokiston rasmiylari o‘tgan hafta Imron Xon yordamchisini armiyadagi qo‘zg‘olonni tashkil qilishda ayblab, qo‘lga olishgandi.

Imron Xon aprel oyida parlamentdagi ovoz berish orqali hokimiyatdan chetlatilganidan so‘ng yangi saylovlar o‘tkazishni talab qilib kelmoqda.

Shuni ham ta’kidlash kerakki, Xonning shanba kungi murojaatini jonli translyatsiya qilish regulyator tomonidan taqiqlab qo‘yildi.

Keyin, yakshanba kuni kechqurun Xon hukumatni siyosiy mitingdagi nutqini taqiqlash uchun yanayam keskinroq choralar ko‘rib, YouTube’ni vaqtincha bloklashgacha borishda aybladi.

Pokiston Telekommunikatsiya boshqarmasi YouTube bloklanishi bo‘yicha holatni izohlamagan.