Россиялик сиёсатшуноснинг қизи Дарья Дугинани Миллий республика армияси партизанлари ўлдиргани маълум қилинди

Россия давлат думаси собиқ депутати Илья Пономарёв Дарья Дугинани қандайдир «Миллий республика армияси» ўлдирганини маълум қилди, деб ёзади TV Net.

Илья Пономарёвнинг айтишича, «ушбу акция, сўнгги ойларда Россия ҳудудида амалга оширилган бошқа кўплаб партизанлик акциялари каби ‘Миллий республика армияси’ томонидан амалга оширилган. Биз Россияда кучайиб бораётган қаршилик тўлқинини ёритиб борувчи ‘Роспартизан’ манбамиз ёрдамида унинг жангчилари билан алоқа ўрнатдик. МРА жангчилари менга бугун уларнинг мурожаатини ўқиб эшиттириш ваколатини берди».

Шундан кейин Пономарёв ташкилот мурожаатини эълон қилди, у ҳокимиятга алоқадор барча россияликларга қарши террор эълон қилишни назарда тутади.

Бундан ташқари, Пономарёв аниқлик киритишича, алоқага чиққан партизанлар машинада Дарья Дугинадан ташқари, унинг отаси ҳам бўлишини кутган. Мухолифатчининг сўзларига кўра, машинани портлатиш учун танланган сана ҳам тасодифий эмас — «роппа-роса бир йил аввал Дугин ўлдириш кераклиги ҳақида твит ёзганди».

Эслатиб ўтамиз, россиялик жамоат арбоби, сиёсатшунос Александр Дугиннинг қизи Дарья ҳайдаб кетаётган Land Cruiser Prado автомобили 20 август куни кечқурун Москва халқа автомобиль йўлидан тахминан 25 км масофада портлаб кетди. Дарья воқеа жойида ҳалок бўлган.

Запорожье вилояти ҳарбий-фуқаролик маъмурияти аъзоси Владимир Рогов ва ДХР раҳбари Денис Пушилин ҳодисада «украиналик террорчилар» қўли борлигини, улар аслида Александр Дугинни нишонга олганини айтди.

Россия Ташқи ишлар вазирлиги вакили Мария Захарова воқеа юзасидан изоҳ берар экан, агар қотилликда «Украинанинг қўли борлиги» ҳақидаги версия ваколатли органлар томонидан тасдиқланса, «Киев томонидан амалга оширилаётган давлат терроризми сиёсати» ҳақида гапириш керак бўлишини айтди.

Украина президенти офиси ҳодисага алоқадорлигини рад этмоқда.

Илья Пономарёв 2016 йил 10 июнгача Россия Давлат думаси депутати бўлган. 2019 йил майида ўша пайтдаги президент Пётр Порошенко Пономарёвга Украина фуқаролигини тақдим этган. Пономарёв 2014 йил мартида Қримнинг Россияга қўшилишига қарши чиққан ягона россиялик депутат бўлган.