Podmoskovyeda jamoat arbobi Aleksandr Duginning qiziga tegishli avtomobil portlab ketdi, deb yozadi Asia Plus. Rossiya Tergov qo‘mitasi jamoat uchun xavfli usulda amalga oshirilgan qotillik holati yuzasidan ish ochdi.
Rossiya OAVlariga ko‘ra, siyosatshunos va jurnalist Darya Dugina boshqarayotgan yo‘ltanlamas avtomobil Odinsovo shahrida portlab ketgan, u voqea joyida halok bo‘lgan. Uning avtomobiliga o‘rnatilgan portlovchi qurilma quvvati trotil ekvivalentda 400 grammni tashkil etgan. Bu haqda “TASS” huquq-tartibot organlariga tayanib ma’lum qilgan.
Mashina Duginning o‘ziga tegishli bo‘lgan. U 20-avgust kuni kechki payt 9 larda yurib ketayotgan vaqtida portlagan. Portlash sabablari haqida rasmiy ma’lumot berilganicha yo‘q.
“Kommersant” yozishicha, Aleksandr Dugin va qizi Darya 20-avgust, shanba kuni “Traditsiya” vatanparvarlik festivalida qatnashgan. Tadbirdan keyin ular turli avtomobillarda jo‘nab ketgan.
Aleksandr Dugin — faylasuf va siyosatshunos bo‘lib, “yevrosiyochilik”, Rossiyaning sobiq sovet respublikalari bilan integratsiyalashuvi orqali o‘ta kuchli davlat tuzish g‘oyalarini ilgari suradi. Amerika OAVlari Aleksandr Duginni ko‘p bora “Putinning miyasi” deb atagan.
U Ukrainaga Rossiya qo‘shinlari kiritilishi va uning deyarli butun hududini bosib olishni yoqlab chiqqan. 2015-yil martidan buyon u Ukrainadagi voqealar tufayli AQSH sanksiyaalr ro‘yxatiga kiritilgan. Bundan tashqari, Kanada va Avstraliya ham Duginga qarshi sanksiyalar joriy qilgan.
Darya Dugina otasining g‘oyalari tarafdori bo‘lgan va u ham jamoatchilik faoliyati bilan shug‘ullangan.
Zaporojye viloyati harbiy-fuqarolik ma’muriyati a’zosi Vladimir Rogov va DXR rahbari Denis Pushilin hodisada “ukrainalik terrorchilar” qo‘li borligini, ular aslida Aleksandr Duginni nishonga olganini aytdi.
Rossiya Tashqi ishlar vazirligi vakili Mariya Zaxarova voqea yuzasidan izoh berar ekan, agar qotillikda “Ukrainaning qo‘li borligi” haqidagi versiya vakolatli organlar tomonidan tasdiqlansa, “Kiyev tomonidan amalga oshirilayotgan davlat terrorizmi siyosati” haqida gapirish kerak bo‘lishini aytdi.
Ukraina prezidenti ofisi hodisaga aloqadorligini rad etmoqda.
“Ta’kidlab o‘taman, Ukraina, shubhasiz, bunga aloqador emas, chunki biz Rossiya Federatsiyasi kabi jinoyat davlati emasmiz, ustiga-ustak terrorchilik davlati ham emasmiz”, — dedi prezident ofisi rahbari Mixail Podolyak.
Darya Dugina 1992-yilda tug‘ilgan, Moskva davlat universitetining falsafa fakultetini bitirib, otasi rahbarlik qiluvchi “Xalqaro Yevrosiyo harakati”da siyosiy sharhlovchi bo‘lib ishlagan.
Izoh (0)