Farg‘ona viloyati Rishton tumanida tadbirkorga 674 million so‘m kompensatsiya undirib beriladigan bo‘ldi. Bu haqda tuman adliya bo‘limi axborot xizmati xabar berdi.
Ma’lum qilinishicha, Rishton “Avtoshohbekat” MCHJ rahbari tuman adliya bo‘limiga murojaat qilgan. Unda tuman hokimining 2019-yildagi qarori asosida Farg‘ona ko‘chasida joylashgan jamiyatga tegishli bino-inshootlar buzdirilgani aytilgan. Shuningdek, “Avtoshohbekat” mas’uliyati cheklangan jamiyatining huquqiy hujjatlariga asosan, tashkilotga tegishli bo‘lgan 3957 kvadrat metr yer maydonidan 553 kvadrat metr qismi davlat ehtiyojlari uchun olingani ma’lum qilingan. Biroq shu kunga qadar MCHJga yetkazilgan jami 450 million so‘m zarar qoplanmagan. Davlat ehtiyojlari uchun olib qo‘yilgan 553 kvadrat metr yer maydoni umuman ajratib berilmagan.
Tuman adliya bo‘limiga shu mazmundagi murojaatda 2019—2022-yillar davomida yuz bergan inflyatsiya daromadlarini ham hisobga olib, jamiyatning buzilgan huquqlarini tiklab berilishida va zararni undirilishida amaliy ko‘mak berishni so‘ragan. Adliya bo‘limi tomonidan Rishton “Avtoshohbekat” MCHJ rahbarining murojaati o‘rganilganida haqiqatan ham tuman hokimining 2019-yil 13-maydagi qarori bilan Rishton shahri Farg‘ona ko‘chasi 6-uyda joylashgan MCHJga tegishli bino-inshootlari buzdirilgani aniqlangan.
Shu bilan birga, ushbu buzilgan bino-inshootlarga yetkazilgan zarar hamda yer uchastkasi evaziga MCHJ rahbari M.Dadayev bilan tuman hokimligi o‘rtasida tuzilgan o‘zaro og‘zaki kelishuv bilan 2 ming 942 kvadrat metr yer uchastkasi ajratib berish to‘g‘risida tuman hokimi qarori qabul qilingan.
Lekin hozirgi kunda avtoshohbekat atrofida joylashgan turar va noturar binolar o‘z o‘rnida buzilmay qolgani sababli tuman hokimining ushbu qarori ijrosi ta’minlanmagan, ya’ni “Avtoshohbekat” MCHJga yer maydoni ajratib berilmagan.
Rishton tumanlararo iqtisodiy sudiga tuman adliya bo‘limi tomonidan ish yuzasidan da’vo arizasi kiritilgan. Shunga ko‘ra, tuman adliya bo‘limi Rishton tuman hokimligidan MCHJ foydasiga buzilgan bino-inshootlari uchun bozor bahosida 674 million 797 ming so‘m kompensatsiya puli undirish belgilandi.
Izoh (0)