“Hududiy elektr tarmoqlari”ga yil boshidan beri qancha murojaat kelib tushgani aytildi

“Hududiy elektr tarmoqlari” AJga jismoniy va yuridik shaxslardan kelib tushgan 35 747 ta murojaatning 20 152 tasi qanoatlantirilgan. Bu haqda AOKAda o‘tkazilgan brifingda aksionerlik jamiyati axborot xizmati rahbari Faxriddin Nuraliyev ma’lum qildi.

Qayd etilishicha, 35 747 ta murojaatning 27 637 tasi prezident virtual qabulxonasi, 413 tasi bosh vazirining tadbirkorlar murojaatlarini ko‘rib chiqish virtual qabulxonasi, 1068 tasi Bosh prokuraturaning ishonch telefoni orqali kelib tushgan.

“Hududiy elektr tarmoqlari” AJ va uning hududiy tuzilmalariga kelib tushgan murojaatlar soni 4886 tani tashkil etsa, ijtimoiy tarmoqlardagi rasmiy messenjer kanal orqali 1743 ta murojaat yo‘llangan. 2022-yilning 1-yarim yilligida kelib tushgan murojaatlarning 20 152 tasi qanoatlantirilgan, 13 128 tasi yuzasidan tushuntirishlar berilgan hamda 2467 ta murojaat ayni paytda ko‘rib chiqilish jarayonida.