Qoraqalpog‘istonning sobiq ichki ishlar vaziri Jo‘qorg‘i Kenges deputati bo‘ldi

Qoraqalpog‘iston Respublikasi Jo‘qorg‘i Kengesida bo‘shab qolgan deputatlik o‘rinlari uchun saylovlar bo‘lib o‘tdi. 5 ta deputatlik o‘rniga 25 nafar talabgor kurash olib bordi. Jo‘qorg‘i Kenges deputatligiga saylanganlar orasida yaqindagina lavozimini Qoraqalpog‘iston ichki ishlar vaziridan Vazirlar Kengashi raisining birinchi o‘rinbosariga o‘zgartirgan Amanbay O‘rinbayev ham bor. 

Ayni paytda Vazirlar Kengashi raisining Ekologiya va Orolbo‘yi hududlarini rivojlantirish masalalari bo‘yicha birinchi o‘rinbosari bo‘lgan Amanbay Tleubayevich 21-avgust kuni o‘tkazilgan saylovlarning yakunlari bo‘yicha Jo‘qorg‘i Kenges deputati etib saylangan. Deputatning nomzodi O‘zbekiston ekologiya partiyasidan Chimboy tumani 56-sonli “Berdaq” saylov okrugidan nomzod qilib ko‘rsatilgan edi.

Jo‘qorg‘i Kenges deputati bo‘lganlar orasida Vazirlar Kengashi raisining yana bir o‘rinbosari Rustam Saparbayev ham bor. Rustam Tursinbayevich amalda Vazirlar Kengashi raisining jamoat va diniy tashkilotlar bilan aloqalar bo‘yicha o‘rinbosari. U O‘zbekiston Xalq demokratik partiyasidan 18-sonli “Janbasqala” saylov okrugidan nomzod qilib ko‘rsatilgan edi.