Samarqandda ilk bor jigar ko‘chirish operatsiyasi bajarilgani, 35 yoshli qiz 57 yoshli onasiga donorlik qilgani xabar berilgandi. Mazkur amaliyotdan bir necha kun o‘tib, bemor ham donor ham shifoxonada vafot etgani xabar berildi. Viloyat sog‘liqni saqlash boshqarmasi axborot xizmati “Daryo”ga shu haqda qo‘shimcha axborot berdi.
Ma’lum bo‘lishicha, 57 yoshli bemor so‘nggi to‘rt yil davomida viloyat ko‘p tarmoqli tibbiyot markazida jigar sirrozi kasalligidan davolanib kelgan. Ammo salomatligi borgan sari yomonlashishi tufayli u joriy yil 27-iyul kuni jarrohlik bo‘limiga yotqizilgan. Bemorda standart asosida bajarilgan tekshiruvlardan keyin operatsiya oldi konservativ terapiyasi o‘tkazilgan.
Jigar transplantatsiyasidan avval bemor, donor va uning qarindoshlari bilan birgalikda qonunchilikda belgilangan va qonunosti hujjatlarida ko‘rsatilgan standartlar asosida ish yuritilgan.
13 soatu 20 daqiqa davom etgan jarrohlik amaliyotidan so‘ng bemor reanimatsiya bo‘limiga o‘tkazilib, intensiv davo muolajalari davom ettirilgan. Biroq dastlabki tahlillarga qaraganda, stabil og‘ir ahvoldagi ushbu fuqaro 12-avgustda o‘tkir yurak-qon tomirlari yetishmovchiligi tufayli vafot etgan.
Bemorga donorlik qilgan 35 yoshli qizi standart asosida tekshirilib, transplantatsiya qilingan. Operatsiyadan so‘ng unda intensiv davo muolajalari olib borilgan.
“Ammo donorda buyrak yetishmovchiligi, ikki tomonlama zotiljam asorati kuzatilib, standart bo‘yicha intensiv davo choralari qo‘llanilgan. Shunga qaramay, umumiy holati yaxshilanib borayotgan bemorning ahvoli 16-avgust kuni birdan yomonlashib, yurak urishi to‘xtagan. Reanimatsion tadbirlar o‘tkazilishiga qaramasdan, unda biologik o‘lim kuzatildi”, — deydi viloyat Sog‘liqni saqlash boshqarmasi axborot xizmati vakili.
Mutaxassislarning ta’kidlashicha, donorda o‘pka tomirlarining tromboemboliyasi asorati kuzatilganligi gumon qilingan. Holat yuzasidan huquq-tartibot idoralari xodimlari tomonidan tergov-surishtiruv ishlari olib borilmoqda.
Izoh (0)