Фарғона вилояти Риштон туманида тадбиркорга 674 миллион сўм компенсация ундириб бериладиган бўлди. Бу ҳақда туман адлия бўлими ахборот хизмати хабар берди.
Маълум қилинишича, Риштон «Автошоҳбекат» МЧЖ раҳбари туман адлия бўлимига мурожаат қилган. Унда туман ҳокимининг 2019 йилдаги қарори асосида Фарғона кўчасида жойлашган жамиятга тегишли бино-иншоотлар буздирилгани айтилган. Шунингдек, «Автошоҳбекат» масъулияти чекланган жамиятининг ҳуқуқий ҳужжатларига асосан, ташкилотга тегишли бўлган 3957 квадрат метр ер майдонидан 553 квадрат метр қисми давлат эҳтиёжлари учун олингани маълум қилинган. Бироқ шу кунга қадар МЧЖга етказилган жами 450 миллион сўм зарар қопланмаган. Давлат эҳтиёжлари учун олиб қўйилган 553 квадрат метр ер майдони умуман ажратиб берилмаган.
Туман адлия бўлимига шу мазмундаги мурожаатда 2019—2022 йиллар давомида юз берган инфляция даромадларини ҳам ҳисобга олиб, жамиятнинг бузилган ҳуқуқларини тиклаб берилишида ва зарарни ундирилишида амалий кўмак беришни сўраган. Адлия бўлими томонидан Риштон «Автошоҳбекат» МЧЖ раҳбарининг мурожаати ўрганилганида ҳақиқатан ҳам туман ҳокимининг 2019 йил 13 майдаги қарори билан Риштон шаҳри Фарғона кўчаси 6-уйда жойлашган МЧЖга тегишли бино-иншоотлари буздирилгани аниқланган.
Шу билан бирга, ушбу бузилган бино-иншоотларга етказилган зарар ҳамда ер участкаси эвазига МЧЖ раҳбари М.Дадаев билан туман ҳокимлиги ўртасида тузилган ўзаро оғзаки келишув билан 2 минг 942 квадрат метр ер участкаси ажратиб бериш тўғрисида туман ҳокими қарори қабул қилинган.
Лекин ҳозирги кунда автошоҳбекат атрофида жойлашган турар ва нотурар бинолар ўз ўрнида бузилмай қолгани сабабли туман ҳокимининг ушбу қарори ижроси таъминланмаган, яъни «Автошоҳбекат» МЧЖга ер майдони ажратиб берилмаган.
Риштон туманлараро иқтисодий судига туман адлия бўлими томонидан иш юзасидан даъво аризаси киритилган. Шунга кўра, туман адлия бўлими Риштон туман ҳокимлигидан МЧЖ фойдасига бузилган бино-иншоотлари учун бозор баҳосида 674 миллион 797 минг сўм компенсация пули ундириш белгиланди.
Изоҳ (0)