Serbiya manfaatli shartlarda Ozarbayjondan elektr energiyasi sotib ololadi. Bu haqda Serbiya prezidenti Aleksandr Vuchich va Ozarbayjon prezidenti Ilhom Aliyev o‘rtasida bo‘lib o‘tgan telefon suhbatidan keyin Serbiya davlat rahbari kanselyariyasi ma’lum qildi, deb yozadi “Interfaks”.
Vuchich yetarli miqdorda elektr energiyasi bilan ta’minlashda yordam so‘rab Aliyevga murojaat qildi, Ozarbayjon rahbari esa bu iltimosga javob qilib, Serbiya tomonidan Ozarbayjondan manfaatli shartlarda elektr energiyasi sotib olinishi to‘g‘risidagi davlatlararo bitimni ma’qullaganini aytdi.
Serbiya va Ozarbayjon o‘rtasida diplomatik aloqalar o‘rnatilganiga 25 yil to‘lishi munosabati bilan Serbiya tomoni tashabbusi bilan o‘tkazilgan suhbat chog‘ida hamkorlikni davom ettirish bo‘yicha muayyan takliflar, shuningdek, o‘zaro manfaatli bo‘lgan masalalar muhokama qilindi.
Davlatlar rahbarlari chorak asr davomida Serbiya va Ozarbayjon yaxshi hamkorlikni yo‘lga qo‘ygani, Belgrad va Boku munosabatlari esa strategik sheriklik darajasiga yetgani haqidagi yagona fikrga keldi.
Vuchich qayd etishicha, Belgrad Boku bilan do‘stlik va hamjihatlikka asoslangan aloqalarni bundan keyin ham davom ettirish niyatida.
U ozarbayjonlik hamkasbini tezroq Serbiyaga tashrif buyurib, qo‘shma sa’y-harakatlar orqali “ayniqsa energetika va qishloq xo‘jaligi kabi sohalarda hamkorlikka turtki berish”ga chaqirdi.
Vuchich Ozarbayjonga Serbiya hududiy yaxlitligi va suverenitetini hurmat qilgani uchun minnatdorlik bildirdi va Belgrad BMTning barcha a’zolarining xalqaro huquqlari va chegaralari daxlsizligiga nisbatan qat’iy hurmat saqlashini ta’kidladi.
Izoh (0)