Yaponiya hukumati mintaqadagi keskinlikning kuchayishi hamda Xitoy va Shimoliy Koreyaning harakatlari tufayli uzoq masofaga uchuvchi qanotli raketalar arsenalini 1000 tagacha oshirish imkoniyatini ko‘rib chiqmoqda. Bu haqda Yaponiya Vazirlar Mahkamasidagi manbalarga tayanib, Yomiuri Shimbun nashri xabar berdi.
Nashrning ta’kidlashicha, uchish masofasi 100 kilometrga yaqin bo‘lgan mavjud raketalar ming kilometrgacha bo‘lgan masofadagi nishonlarga zarba beradigan tarzda modernizatsiya qilinadi.
Ushbu raketalarni kema yoki samolyotlardan uchirish mumkin bo‘ladi. Qurollar Shimoliy Koreya va Xitoyning qirg‘oqbo‘yi hududlariga yetib borishi uchun ularni asosan janubiy Nansey orollari atrofiga joylashtirish rejalashtirilgan.
Xabarda aytilishicha, bu reja 2022-yilning 2—3-avgust kunlari AQSH Kongressi Vakillar palatasi spikeri Nensi Pelosining Tayvanga tashrifidan keyin orol atrofida keskinlashgan vaziyat bilan bog‘liq holda ko‘rib chiqilmoqda.
Xitoy Tashqi ishlar vazirligi ushbu tashrifni Xitoy suvereniteti va hududiy yaxlitligini qo‘pol ravishda buzish deb atagan hamda “qat’iy, kuchli va samarali” choralar ko‘rishga va’da bergandi. Keyin Pekin Tayvan atrofidagi oltita zonada eng yirik harbiy mashg‘ulotlarni o‘tkazdi.
Izoh (0)