So‘nggi uch kun ichida Hindiston shimoli va sharqida musson yomg‘irlari sabab yuzaga kelgan suv toshqinlari hamda ko‘chkilar oqibatida kamida 50 kishi halok bo‘ldi. Bu haqda g‘arb matbuotiga tayanib, “Interfaks” xabar bermoqda.
Xususan, mamlakatning Uttarakxand shtatida to‘rt kishi halok bo‘lgan, yana 13 kishi bedarak yo‘qolgan.
Mamlakat sharqidagi Jarkxand shtatida Nalkari daryosi o‘zanidan toshib, besh kishining hayotiga zomin bo‘lgan, ulardan to‘rt nafarining jasadi topilgan. Qo‘shni Odisha shtatida esa rasmiylar tinimsiz yomg‘irlar ostida olti kishi halok bo‘lganini qayd etdi.
Shuningdek, Odishada yomon ob-havo 800 ming kishiga zarar yetkazgan, minglab aholi uylarini tark etishga majbur bo‘lgan. Yomg‘irlar elektr va suv oqimining uzilishiga olib kelgan hamda yo‘llarni vayron qilgan.
Ommaviy axborot vositalarining eslatishicha, avgust oyi boshida meteorologlar avgust va sentabr oylaridagi musson mavsumida Hindistonda o‘rtacha yog‘ingarchilikning pasayishini prognoz qilgandi. Shu sabab Osiyoda uchinchi yirik iqtisodiyotga ega Hindistonda hosil yaxshi bo‘lishi kutilayotgan edi. Qishloq xo‘jaligi Hindiston iqtisodiyotining 15 foizini tashkil qiladi, mamlakatdagi 1,3 milliarddan ortiq aholining yarmidan ko‘pi unga qaram hisoblanadi.
Izoh (0)