Сербия манфаатли шартларда Озарбайжондан электр энергияси сотиб ололади. Бу ҳақда Сербия президенти Александр Вучич ва Озарбайжон президенти Илҳом Алиев ўртасида бўлиб ўтган телефон суҳбатидан кейин Сербия давлат раҳбари канцелярияси маълум қилди, деб ёзади «Интерфакс».
Вучич етарли миқдорда электр энергияси билан таъминлашда ёрдам сўраб Алиевга мурожаат қилди, Озарбайжон раҳбари эса бу илтимосга жавоб қилиб, Сербия томонидан Озарбайжондан манфаатли шартларда электр энергияси сотиб олиниши тўғрисидаги давлатлараро битимни маъқуллаганини айтди.
Сербия ва Озарбайжон ўртасида дипломатик алоқалар ўрнатилганига 25 йил тўлиши муносабати билан Сербия томони ташаббуси билан ўтказилган суҳбат чоғида ҳамкорликни давом эттириш бўйича муайян таклифлар, шунингдек, ўзаро манфаатли бўлган масалалар муҳокама қилинди.
Давлатлар раҳбарлари чорак аср давомида Сербия ва Озарбайжон яхши ҳамкорликни йўлга қўйгани, Белград ва Боку муносабатлари эса стратегик шериклик даражасига етгани ҳақидаги ягона фикрга келди.
Вучич қайд этишича, Белград Боку билан дўстлик ва ҳамжиҳатликка асосланган алоқаларни бундан кейин ҳам давом эттириш ниятида.
У озарбайжонлик ҳамкасбини тезроқ Сербияга ташриф буюриб, қўшма саъй-ҳаракатлар орқали «айниқса энергетика ва қишлоқ хўжалиги каби соҳаларда ҳамкорликка туртки бериш»га чақирди.
Вучич Озарбайжонга Сербия ҳудудий яхлитлиги ва суверенитетини ҳурмат қилгани учун миннатдорлик билдирди ва Белград БМТнинг барча аъзоларининг халқаро ҳуқуқлари ва чегаралари дахлсизлигига нисбатан қатъий ҳурмат сақлашини таъкидлади.
Изоҳ (0)