Serbiya dunyo hamjamiyati vakillariga murojaat qilib, qisman tan olingan Kosovo respublikasi bilan nizoni to‘xtatishni so‘radi. Bu haqda mamlakat prezidenti Aleksandr Vuchich Kosovo-Serbiya chegarasidagi vaziyat keskinlashishi tufayli Serbiya Qurolli kuchlari Bosh shtabida bo‘lib o‘tgan shoshilinch yig‘ilish yakunlari bo‘yicha aytib o‘tdi, deb yozadi “RBK”.

“Biz barcha xalqaro vakillardan bor imkoniyatni ishga solishni so‘radik. Muloqot davom etishi va biz masalani tinch yo‘l bilan hal qilishga intilishimiz muhimdir. Bizda yaxshi yangiliklar bo‘lishiga ishonaman, bularning barchasi bugun kechqurun bo‘lmasa-da, ertaga tugashiga umid qilaman… Ular qilgan narsalarning barchasi Serbiyaga hujum qanchalik oldindan o‘ylanganligini ko‘rsatmoqda”, — dedi u.

Vuchich Bosh shtabga 31-iyul kuni kechqurun Prishtina bilan nizo kuchayishi fonida kelgandi.

Serbiya va Kosovo chegarasidagi vaziyat shu kuni kechqurun keskinlasha boshladi. Bunga qisman tan olingan davlat hukumatining serblarga respublikaga kirishda chegarani bosib o‘tganlik haqida vaqtinchalik hujjat olish majburiyatini yuklash qarori sabab bo‘ldi. Serbiya hujjatlari 1-avgustdan amal qilishdan to‘xtashi rejalashtirilgan edi. Prishtina shu tariqa Belgradga javob qilayotganini qayd etdi, u esa Kosovoda berilgan guvohnomalarni tan olishdan bosh tortmoqda.

Keyinroq Kosovska-Mitrovitsa shahrining janubiy qismida, shaharni ajratib turuvchi ko‘prik ortida 200 ga yaqin albanlar to‘plandi. Serblar bunga javoban barrikadalar qura boshladi. Shu kuni kechki payt shaharning shimoliy qismida sirenalar chalindi. Chegaradan o‘tish joylariga esa Kosovo maxsus kuchlari joylashtirildi. O‘shanda Vuchich Prishtina Kosovo serblariga qarshi operatsiya tayyorlayotganini, u yarim tunga yaqin boshlanishini taxmin qildi.

Kosovo hukumati politsiyani va boshqa maxsus bo‘linmalarni safarbar qildi. OAVlarga ko‘ra, Prishtinadan respublikaning shimoliy tumanlariga qarab milliy politsiya maxsus bo‘linmalari suv zambaraklari bilan yo‘lga chiqqan, ularga tez yordam brigadalari hamrohlik qilgan.

Ayni vaqtda Serbiya Mudofaa vazirligi o‘zining Kosovo shimolidagi voqealarda ishtirok etayotgani haqidagi xabarlarni rad etdi va dezinformatsiyaga ishonmaslikni so‘radi.

Rossiya Tashqi ishlar vazirligi Prishtinaning xatti-harakatlarini qoralab, unga AQSH va Yevroittifoq homiylik qilayotganini qayd etdi.

Avvalroq Kosovo hukumati Serbiya bilan chegarada vaziyatning keskinlashuviga sabab bo‘lgan, qisman tan olingan respublika hududida serb hujjatlarining amal qilishini to‘xtatish to‘g‘risidagi qonun qabul qilinishini 1-sentabrgacha kechiktirish haqidagi qarorini e’lon qildi.