Ekstremal issiqlik tufayli jahon bozorida paxta narxi 30 foizga oshdi, deb xabar bermoqda Bloomberg. Hindiston, Xitoy, AQSH va Braziliya iqlim o‘zgarishi sababli paxta yetishtirish bilan bog‘liq muammolarga duch kelmoqda.
Tahlilchilarning bahosiga ko‘ra, kuchli qurg‘oqchilik va jazirama to‘lqinlari Braziliyada paxta hosildorligini qariyb 30 foizga, AQSHda esa 28 foizga kamaytirgan. Ayni paytda jahonda yetishtiriladigan paxtaning deyarli yarmi ushbu mamlakatlar hissasiga to‘g‘ri keladi.
Hindistonda kuchli yomg‘ir va hasharotlar tufayli ishlab chiqarish shu qadar pasayib ketganki, mamlakat xorijdan xomashyo sotib ola boshlashga majbur bo‘lgan. Xitoy ham ob-havo sharoiti paxta hosilini sezilarli darajada qisqartirishidan xavotirda.
Natijada, Bloomberg ma’lumotlariga ko‘ra, paxta narxi 30 foizga oshgan. Xomashyo narxi o‘zining rekord darajasiga 2011-yilda ko‘tarilgan edi. Bozor ishtirokchilari paxta narxi 2022-yilning ikkinchi yarmida barqarorlashishiga umid qilmoqda.
Joriy yilda dunyoning ko‘plab mamlakatlarida harorat rekordlari qayd etildi. Hindistonning ayrim hududlarida havo harorati 50 darajaga yetdi. Xitoy va AQSHda eng issiq kunlarda havo harorati 40 darajaga yetgan.
Izoh (0)