Yaponiya bosh vaziri Fumio Kisida koronavirusga chalindi

Yaponiya bosh vaziri Fumio Kisidada koronavirus aniqlandi. Bu haqda hukumat rahbari idorasiga tayanib, “TASS” xabar berdi.

65 yoshli siyosatchining koronavirusga topshirgan testi natijasi musbat chiqqan. Hozirda u Tokiodagi qarorgohida.

NHK telekanali ma’lumotlariga ko‘ra, 20-avgust oqshomida Kisidada infeksiya alomatlari — isitma va yo‘tal paydo bo‘lgan.

Yaponiya bosh vaziri shu haftaning ikkinchi yarmida mamlakatda nishonlanadigan Obon marhumlarni xotirlash bayrami munosabati bilan bir necha kun dam olgandi. U ta’tilni oilasi bilan Sidzuoka prefekturasida o‘tkazgan. 19-avgust kuni kechqurun Kisida Tokioga qaytib kelgan.

12-avgust kuni Kisida koronavirusga qarshi to‘rtinchi marta emlangan edi. Yaponiyada vaksinaning to‘rtinchi dozasi hozir faqat keksalarga yuborilmoqda.

Kyodo agentligining xabar berishicha, Kisida 27—28-avgust kunlari Tunisga rejalashtirilgan tashrifini bekor qilgan.

Sayohat davomida Yaponiya hukumati rahbari bu yil Tunis mezbonlik qiladigan Afrika taraqqiyoti bo‘yicha Tokio xalqaro konferensiyasida (TICAD) ishtirok etishi kerak edi. Hozir uning ushbu tadbirda videokonferensiya orqali ishtirok etish varianti ko‘rib chiqilmoqda.

Bosh vazir hukumat rahbari sifatida o‘z vazifalarini bajarishda davom etadi va o‘z qarorgohidan turib ishlaydi.