Sudanning Xartum shahridan Efiopiyaning Addis-Abeba shahriga uchayotgan samolyot uchuvchilari parvoz vaqtida uxlab qolgani sababli qo‘nish vaqtida tashvishli vaziyat yuzaga keldi, deb yozmoqda Daily Star.
Ethiopian Airlines aviakompaniyasining ET343 reysi 15-avgust kuni 11 kilometr balandlikda bo‘lganida, ikkala uchuvchi ham samolyotni avtopilotga qo‘yib uxlab qolgan. Dispetcherlarning uchuvchilar bilan bog‘lanishga urinishlari yordam bermagan va samolyot aeroport yonidan uchib o‘tib ketgan.
Yo‘lovchilar baxtiga falokatning oldi olindi. Boeing belgilangan manzil yonidan uchib o‘tganida, uchuvchilar signal ovozidan uyg‘onib ketgan. Ular samolyotni ortga burib, xavfsiz qo‘nishga muvaffaq bo‘lgan, hodisa natijasida hech kim jabrlanmagan.
“Uchuvchilarning charchashi yangilik emas va bu xalqaro miqyosda aviatsiya xavfsizligiga eng katta tahdidlardan birini yaratishda davom etmoqda”, — deydi aviatsiya bo‘yicha tahlilchi Aleks Maheras.
Ikki uchuvchi parvoz vaqtida nima sababdan uxlab qolganini aniqlash uchun tergov boshlandi, biroq ularga hech qanday jazo berilmadi.
Izoh (0)