Rossiyaliklarga Shengen viza berishni taqiqlash Ukrainadagi voqealar munosabati bilan Yevropa Ittifoqining Rossiyaga qarshi sanksiyalari ro‘yxatiga kiritilishi kerak, dedi Chexiya parlamenti vakillari. Xususan, bunday bayonot Chexiya parlamenti yuqori va quyi palatalari xalqaro ishlar qo‘mitalari raislari Pavel Fisher va Marek Jenishek tomonidan berilgan.
“Yevropa Ittifoqi mamlakatlari fuqarolari, shu jumladan, Chexiya fuqarolari xavfsizligi uchun Rossiya Federatsiyasi fuqarolariga Shengen vizalarini berish butunlay to‘xtatilishi kerak”, — deya Fisherning so‘zlaridan iqtibos keltirgan Chex radiosi.
Shu bilan birga, u “qo‘llab-quvvatlovga muhtoj” rossiyaliklar uchun yashash va xalqaro himoya so‘rovi bilan Yevropa davlatlariga murojaat qilish huquqini saqlab qolish kerakligini aytgan.
Qonunchi Jenishek esa rossiyaliklarga Shengen viza berilishini taqiqlash Yevropa Ittifoqining Rossiyaga qarshi dastlabki sanksiyalaridan biri bo‘lishi kerak edi, degan fikrda.
12-avgust kuni Chexiya Tashqi ishlar vazirligi rahbari Yan Lipavskiy ham ushbu taklifni ilgari surgan edi. Uning tushuntirishicha, Rossiya xalqi “bunday jangari siyosatning oqibatlari borligini” tushunishi kerak. Chexiya hozirda Yevropa Ittifoqi kengashiga raislik qilmoqda, tashqi ishlar vazirlari yig‘ilishida Praga tomonidan umumyevropa vizasi to‘xtatilishi taklif qilinadi, dedi vazir. Yig‘ilish 31-avgustga belgilangan.
Chexiya rossiyaliklarga vizalar va yashash uchun ruxsatnomalar berishni to‘xtatgan birinchi YI davlati bo‘lgandi, ushbu qaror 2023-yilning mart oyi oxiriga qadar amal qiladi. Rasmiy Praga o‘z qarorini Rossiyaning Ukrainadagi bosqini munosabati bilan Chexiya Respublikasining tashqi siyosatidagi manfaatlarini himoya qilish va Moskvaga bosim o‘tkazish bilan izohlagan.
O‘z navbatida, Yevrokomissiya Yevropa Ittifoqi rossiyaliklarga vizalar berishni to‘xtata olmasligi haqida ogohlantirgan va bunday chora ittifoqning viza kodeksida ko‘zda tutilmaganini ta’kidlagan.
Mavzuga doir: Estoniya Shengen vizasi bo‘lgan rossiyaliklar uchun o‘z chegarasini yopadi
Izoh (0)