“Al-Qoida” tashkilotiga aloqador “Ash-Shabab” jangarilari Somali poytati Mogadishudagi Hayat mehmonxonasini egallab olishi oqibatida kamida 30 kishi halok bo‘ldi, o‘nlab kishilar yaralandi, deb yozmoqda Somali Guardian nashri. Associated Press xabariga ko‘ra esa, kamida 20 kishi halok bo‘lgan, 40 ga yaqin odam jarohatlangan.
O‘ldirilganlar orasida sobiq amaldorlar, davlat xizmatchilari va ma’naviyat yetakchilari ham bor, deb yozadi nashr. Somali razvedka va xavfsizlik agentligining Mogadishudagi rahbari hamda yuqori martabali politsiya xodimi yaralangan.
Somali Guardian nashriga ko‘ra, guruhning uch nafar a’zosi mehmonxonaga bostirib kirgan. Hujum vaqtida ular portlovchi qurilmalardan ham foydalangan. “Ash-Shabab” harbiy vakili Abu Musabning aytishicha, hujumda 20 dan ortiq odam, jumladan, rasmiylar ham halok bo‘lgan —bu may oyida Somalida Hasan Shayx Muhammad prezident etib qayta saylanganidan beri poytaxtda sodir bo‘lgan birinchi hujumdir.
Hozircha qurbonlarning shaxsi haqida hech narsa ma’lum emas, ammo ma’lumotlar asta-sekin ularning oila a’zolariga yetib bormoqda.
Saylanganidan bir necha hafta o‘tib, Somali prezidenti “Ash-Shabab”ni tor-mor etishga, uning ma’muriyati Mogadishodagi G‘arb tomonidan qo‘llab-quvvatlangan hukumatni ag‘darish uchun so‘nggi 15 yil davomida kurashib kelayotgan ushbu guruhga qarshi keng qamrovli militaristik, iqtisodiy va mafkuraviy hujum boshlashiga va’da bergandi.
Izoh (0)