Япония бош вазири Фумио Кисида коронавирусга чалинди

Япония бош вазири Фумио Кисидада коронавирус аниқланди. Бу ҳақда ҳукумат раҳбари идорасига таяниб, «ТАСС» хабар берди.

65 ёшли сиёсатчининг коронавирусга топширган тести натижаси мусбат чиққан. Ҳозирда у Токиодаги қароргоҳида.

NHK телеканали маълумотларига кўра, 20 август оқшомида Кисидада инфекция аломатлари — иситма ва йўтал пайдо бўлган.

Япония бош вазири шу ҳафтанинг иккинчи ярмида мамлакатда нишонланадиган Обон марҳумларни хотирлаш байрами муносабати билан бир неча кун дам олганди. У таътилни оиласи билан Сидзуока префектурасида ўтказган. 19 август куни кечқурун Кисида Токиога қайтиб келган.

12 август куни Кисида коронавирусга қарши тўртинчи марта эмланган эди. Японияда вакцинанинг тўртинчи дозаси ҳозир фақат кексаларга юборилмоқда.

Kyodo агентлигининг хабар беришича, Кисида 27—28 август кунлари Тунисга режалаштирилган ташрифини бекор қилган.

Саёҳат давомида Япония ҳукумати раҳбари бу йил Тунис мезбонлик қиладиган Африка тараққиёти бўйича Токио халқаро конференциясида (TICAD) иштирок этиши керак эди. Ҳозир унинг ушбу тадбирда видеоконференция орқали иштирок этиш варианти кўриб чиқилмоқда.

Бош вазир ҳукумат раҳбари сифатида ўз вазифаларини бажаришда давом этади ва ўз қароргоҳидан туриб ишлайди.