O‘zbekistonni xalqaro reytinglarda ko‘tarilishi mamlakatda investitsion muhitni yanada yaxshilamoqda. Bu haqda tadbirkor Anvar Abduqayum “Daryo”ga bergan qisqacha intervyusida aytib o‘tdi.
Anvar Abduqayumning aytishicha, avvallari O‘zbekistonga nafaqat chet ellik investorlar, balki mamlakat ichidagi biznesmenlar ham ishonmagan va pul tikkisi kelmagan.
“Mahalliy tadbirkorlarimiz biron narsaga pul tiksa ham tez pul tikib, tez foyda qilib, pulini olib chiqib ketishni o‘ylagan. Oldin faqat Turkiya bilan Xitoydan investorlar kelsa, hozir deyarli Rossiya, Hindiston, Indoneziya, Koreya, Yaponiya, Germaniya kabi iqtisodiy rivojlangan mamlakatlardan ham investorlar kelyapti. Men shaxsan o‘zim bilan ishlash maqsadida kelgan mo‘g‘ulistonlik tadbirkorlar bu yerga 1 million dollargacha pul tikishga tayyorligini bildirdi. Ularni men ishontirganim uchun emas, o‘zlari dunyodagi trentlarni kuzatib, ekonomik biznes xabarlar, biznes jurnallar, biznes saytlarni kuzatib shulardan O‘zbekiston haqida yaxshi taassurotlarga ega ekanligini eshityapmiz”, — dedi tadbirkor.
Uning alohida ta’kidlashicha, Rossiya—Ukraina o‘rtasidagi nizo oqibatida rossiyalik ko‘plab investorlarni O‘zbekistonga oqib kelishiga sababchi bo‘lmoqda.
“Biz ham 14 nafar tadbirkor bilan uchrashdik. Yana kelishyapti. Hammasi bilan hamkorlikda loyihalar qilishga tayyorgarlik ko‘ryapmiz. Boshqa o‘rtoqlarimiz, tanishlarimizga ham Rossiyadan juda ko‘p investorlar va inpartyorlar — tovar oluvchilar kelyapti. Mol oluvchini ham “investor”, deb hisoblasak bo‘ladi. Chunki oldin bizga hech kim pulini ishonmas edi. Bizga pul to‘lab mol olmasdi. Hozir inpartyorlar bizga ishonib oldindan pul to‘lab berishyapti. Bu ham investitsiya hisoblanadi. Chunki oldindan uni to‘lab bergan pulini tadbirkorlar homashyoga tikib, aylanmani kuchaytiroladi. Ya’ni O‘zbekistonning investitsion muhitining rivojlanishi ya’ni chet ellik investorlarda ishonch paydo bo‘lishi bizning tadbirkorlarimizning kuchayishiga, brendga aylanishiga olib keladi va yana ko‘p zavodlar qurilishiga olib keladi. Bundan tashqari, Ukrainadagi vaziyat natijasida u yerda ishlab chiqarilishi to‘xtab qolgan tovalarni o‘rnini bosadigan mollar bilan Yevropani ta’minlash imkoni O‘zbekiston ishlab chiqaruvchilariga juda qo‘l kelishi aniq”, — dedi Anvar Abduqayum.
Tadbirkorning alohida ta’kidlashicha, O‘zbekistonning xalqaro “qizil zona”dan “sariq zona”ga kiritilishi davlatimizga nisbatan Yevropada ishonchning paydo bo‘la boshlaganidan dalolat beradi: “O‘ylaymanki, qo‘rqmasdan O‘zbekistonga pul tikish kerak. Yurtimizda kelgusi 10 yil ichida tikkin pulingizni kamida 5 barobar qilib oladigan darajada investitsion muhit yaratiladi”.
Izoh (0)