Ўзбекистонни халқаро рейтингларда кўтарилиши мамлакатда инвестицион муҳитни янада яхшиламоқда. Бу ҳақда тадбиркор Анвар Абдуқаюм «Дарё»га берган қисқача интервьюсида айтиб ўтди.
Анвар Абдуқаюмнинг айтишича, авваллари Ўзбекистонга нафақат чет эллик инвесторлар, балки мамлакат ичидаги бизнесменлар ҳам ишонмаган ва пул тиккиси келмаган.
«Маҳаллий тадбиркорларимиз бирон нарсага пул тикса ҳам тез пул тикиб, тез фойда қилиб, пулини олиб чиқиб кетишни ўйлаган. Олдин фақат Туркия билан Хитойдан инвесторлар келса, ҳозир деярли Россия, Ҳиндистон, Индонезия, Корея, Япония, Германия каби иқтисодий ривожланган мамлакатлардан ҳам инвесторлар келяпти. Мен шахсан ўзим билан ишлаш мақсадида келган мўғулистонлик тадбиркорлар бу ерга 1 миллион долларгача пул тикишга тайёрлигини билдирди. Уларни мен ишонтирганим учун эмас, ўзлари дунёдаги трентларни кузатиб, экономик бизнес хабарлар, бизнес журналлар, бизнес сайтларни кузатиб шулардан Ўзбекистон ҳақида яхши таассуротларга эга эканлигини эшитяпмиз», — деди тадбиркор.
Унинг алоҳида таъкидлашича, Россия—Украина ўртасидаги низо оқибатида россиялик кўплаб инвесторларни Ўзбекистонга оқиб келишига сабабчи бўлмоқда.
«Биз ҳам 14 нафар тадбиркор билан учрашдик. Яна келишяпти. Ҳаммаси билан ҳамкорликда лойиҳалар қилишга тайёргарлик кўряпмиз. Бошқа ўртоқларимиз, танишларимизга ҳам Россиядан жуда кўп инвесторлар ва инпартёрлар — товар олувчилар келяпти. Мол олувчини ҳам «инвестор», деб ҳисобласак бўлади. Чунки олдин бизга ҳеч ким пулини ишонмас эди. Бизга пул тўлаб мол олмасди. Ҳозир инпартёрлар бизга ишониб олдиндан пул тўлаб беришяпти. Бу ҳам инвестиция ҳисобланади. Чунки олдиндан уни тўлаб берган пулини тадбиркорлар ҳомашёга тикиб, айланмани кучайтиролади. Яъни Ўзбекистоннинг инвестицион муҳитининг ривожланиши яъни чет эллик инвесторларда ишонч пайдо бўлиши бизнинг тадбиркорларимизнинг кучайишига, брендга айланишига олиб келади ва яна кўп заводлар қурилишига олиб келади. Бундан ташқари, Украинадаги вазият натижасида у ерда ишлаб чиқарилиши тўхтаб қолган товаларни ўрнини босадиган моллар билан Европани таъминлаш имкони Ўзбекистон ишлаб чиқарувчиларига жуда қўл келиши аниқ», — деди Анвар Абдуқаюм.
Тадбиркорнинг алоҳида таъкидлашича, Ўзбекистоннинг халқаро «қизил зона»дан «сариқ зона»га киритилиши давлатимизга нисбатан Европада ишончнинг пайдо бўла бошлаганидан далолат беради: «Ўйлайманки, қўрқмасдан Ўзбекистонга пул тикиш керак. Юртимизда келгуси 10 йил ичида тиккин пулингизни камида 5 баробар қилиб оладиган даражада инвестицион муҳит яратилади».
Изоҳ (0)