“Svetoforning yashil chirog‘i bir necha soniya yonmoqda, soatlab qolib ketyapmiz” — Toshkentdagi chorrahalarning birida tirbandlik kuzatilmoqda

Toshkent shahridagi Samarqand darvoza ko‘chasi va Ko‘kcha darvoza ko‘chasi kesishmasidagi chorrahadagi svetoforning yashil chirog‘i bir necha soniya yongani tufayli avtotransport vositalarining harakati qiyinlashgan. Bu haqda “Daryo” o‘quvchisi xabar bermoqda.

Uning aytishicha, tirbandlikka svetofor chiroqlarining kam vaqt oraliqda o‘zgarishi sabab bo‘lmoqda.

“Chorsu” tarafdan to “Samarqand darvoza” savdo markazigacha bo‘lgan oralik shu svetofor chiroqlarining noqulay, ya’ni tez o‘zgarishi harkatni qiyinlashtirmoqda. To shu chorrahadan chiqib ketgunimga qadar 40 minutdan ortiq vaqt ketdi. Chorrahaga svetoforni bunday tizimda o‘rnatganlar yo‘lning o‘tkazuvchanligini hisobga olmagan”, — deydi haydovchi.

U bunday “tartib” o‘rnatganlarga “rahmat” aytgan.

Eslatib o‘tamiz, shu yili ushbu chorraha Toshkent shahar hokimligi tomonidan ta’mirlanib, qayta ishga tushurilgan edi.

Mutasaddilardan holat yuzasidan izoh kutib qolamiz.