O‘zbekistonda 2016-yilda faoliyat ko‘rsatayotgan korxonalar soni 268 mingtani tashkil etgan bo‘lsa, 2021-yilda 529 mingtaga yetdi. Bu haqda Iqtisodiy tadqiqotlar va islohotlar markazi “Daryo”ga ma’lum qildi.
Pandemiya davrida kichik biznes duch kelgan qiyinchiliklarga qaramay, tadbirkorlik ta’sirchan o‘sish sur’atlarini ko‘rsatmoqda.
2016-yilda yangi tashkil etilgan korxonalar soni qariyb 33 mingtani tashkil etgan bo‘lsa, 2021 yilda ularning soni 103 mingtadan oshdi (o‘sish 3,1 baravar).
So‘nggi 5 yil ichida tadbirkorlar soni uch baravar ko‘paydi va hozirda 1,5 mln kishini tashkil etadi, xususiy sektor korxonalarida esa 5 millionga yaqin kishi mehnat qilmoqda.
2021-yilda kichik biznesning mamlakat iqtisodiyotidagi ulushi:
- sanoat — 27 foiz;
- qurilish — 72 foiz;
- YIM — 55 foiz;
- bandlik — 74 foiz;
- eksport — 22 foiz.
2021-yilda iqtisodiy faoliyat turlari bo‘yicha korxonalar soniga ko‘ra ko‘rinish quyidagicha:
- savdoda — 157 ming;
- sanoatda — 91 ming;
- qishloq xo‘jaligida — 47 ming;
- qurilishda — 44 ming;
- turar joy va oziq-ovqatda — 33 ming;
- tashish va saqlashda — 18 ming;
- axborot-kommunikatsiyada — 11 ming;
- sog‘liqni saqlash sohasida — 10 ming;
- boshqalar — 118 ming korxona.
Tadbirkorlarning murojaatlari va takliflari asosida Prezident yig‘ilishda biznesning to‘liq va samarali ishlashiga to‘sqinlik qiluvchi muammolarni hal etish bo‘yicha keyingi ishlar uchun 7 ta muhim yo‘nalishni belgilab berdi:
- biznesni moliyalashtirish va moliya-kredit masalalari;
- soliq tizimini takomillashtirish, biznesga soliq yukini imkon qadar kamaytirish;
- yer ajratish masalalari;
- infratuzilmani rivojlantirish masalalari;
- eksportyor korxonalarni qo‘llab-quvvatlash;
- transport-logistika masalalari;
- tadbirkorlikka oid tartib-taomillarni soddalashtirish.
2016-2021 yillar davomida O‘zbekiston yalpi ichki mahsuloti (YIM) 24 foizga, sanoat ishlab chiqarish hajmi esa 34 foizga o‘sdi.
O‘zbekistonda soliq tushumlari hajmining ham barqaror o‘sishi kuzatilmoqda. 2022-yil 1-yanvardan 27-iyungacha bo‘lgan davrda o‘tgan yilning shu davriga nisbatan 15,3 foizga o‘sdi.
Tahlil qilingan davr uchun bojxona to‘lovlari bo‘yicha tushumlar 2021-yilning shu davriga nisbatan 41,2 foizga oshdi.
Joriy yil boshidan 27-iyungacha bo‘lgan davrda tovar eksport qilish hajmi o‘tgan yilning shu davriga nisbatan 25,4 foizga oshdi.
Tahlil qilinayotgan davrda O‘zbekiston tovar-xomashyo birjasida tuzilgan bitimlar hajmi 42,8 foizga oshdi.
Izoh (0)