O‘zbekisonning 2022-yil yanvar—iyul oylaridagi tashqi savdo aylanmasi ma’lum bo‘ldi. Bu haqda Davlat statistika qo‘mitasi xabar bermoqda.
Joriy yilning dastlabki 7 oyida tashqi savdo aylanmasi 28,1 mlrd dollarni tashkil qilgan. Bu ko‘rsatkich o‘tgan yilning shu davriga nisbatan 6,3 mlrd dollarga ko‘proqdir.
Yanvar—iyul oylariga ko‘ra eksport 11,3 mlrd dollar bo‘lgan bo‘lsa, import 16,8 mlrd dollarga yetgan. 2021-yilning ilk 7 oyida bu ko‘rsatkichlar mos ravishda 8,2 mlrd dollar va 13,6 mlrd dollar edi.
O‘zbekiston yil boshidan beri qariyb 3 mlrd dollarlik oltin sotgan. Mamlakat mart oyidan beri oltin sotmayapti.
2022-yilning yanvar—iyul oylarida 5,6 mlrd dollarlik passiv tashqi savdo balansi kuzatildi. O‘tgan yili bu ko‘rsatkich 5,4 mlrd dollar edi.
O‘zbekiston eng ko‘p savdo qilayotgan 10 ta davlatdan 7 tasiga kamroq sotib, ulardan ko‘proq sotib olmoqda.
O‘zbekiston dunyoning 185 mamlakati bilan savdo aloqalarini amalga oshirib kelmoqda.
Tashqi savdo aylanmasining nisbatan salmoqli hissasi Xitoy (18,6 foiz), Rossiya (17,1 foiz), Qozog‘iston (8,8 foiz), Turkiyada (7,1 foiz), Koreya (5,2 foiz), Qirg‘iziston (2,3 foiz) va Turkmanistonda (2,3 foiz) qayd etilgan.
O‘zbekiston nima sotdi
Joriy yilning yanvar—iyul oylarida mamlakatning eksportyorlari soni 5 606 tani tashkil etib, ular tomonidan oltindan tashqari 8,3 mlrd dollarlik tovar va xizmatlar eksport qilinishi ta’minlandi. Bu o‘tgan yilga nisbatan 22,6 foizga ko‘p.
Eksport tarkibida tovarlar ulushi 82,2 foizni tashkil etib, ular sanoat tovarlari (24,3 foiz), oziq-ovqat mahsulotlari va tirik hayvonlar (6,9 foiz), kimyoviy vositalar va shunga o‘xshash mahsulotlar (6,4 foiz) hissasiga to‘g‘ri kelmoqda.
Miqdorlar haqida gapiradigan bo‘lsak, oltin 2,97 mlrd dollarga, sanoat tovarlari 2,7 mlrd dollarga, xizmatlar esa 2 mlrd dollarga sotilgan.
Yil boshidan beri xomashyo va yoqilg‘idan tashqari nooziq-ovqat mahsulotlari savdosi o‘tgan yilning shu davriga nisbatan kamaydi.
12,6 foiz ulush bilan Xitoy asosiy xaridor bo‘lgan. Ikkinchi o‘rinda Rossiya (12,3 foiz), uchinchi o‘rinda Turkiya (9,2 foiz).
Toshkent shahri, Toshkent va Andijon viloyatlari xorijga eng ko‘p mahsulot sotgan. Eng kam sotganlar — Surxondaryo, Xorazm va Jizzax viloyatlari.
O‘zbekiston nima sotib oldi
Birinchi o‘rinda avvalgi yillardagi kabi sanoatni rivojlantirish uchun mashina va uskunalar (33,2 foiz).
Ikkinchi o‘rinda sanoat mahsulotlari (18,9 foiz) egallagan bo‘lsa, uchinchi o‘rinda kimyoviy vositalar va shunga o‘xshash mahsulotlar (13,6 foiz) egalladi.
O‘zbekiston eng ko‘p Xitoy (22,1 foiz), Rossiya (19,5 foiz) va Qozog‘istondan (10,3 foiz) xarid qilgan.
Hududlar bo‘yicha eng ko‘p import qilingan mahsulotlar Toshkent shahri, Toshkent va Andijon viloyatlariga to‘g‘ri keladi. Eng kami — Qashqadaryo, Qoraqalpog‘iston hamda Surxondaryo viloyatiga.
Izoh (0)