Yaqin Sharq davlatlari neft sotishdan keyingi to‘rt yil ichida qo‘shimcha 1,3 trillion dollar oladi, bu esa ularning suveren boyligini mustahkamlaydi. Bu haqda Financial Times Xalqaro valyuta fondi (XVF) ma’lumotlariga tayanib xabar berdi.
“Yaqin Sharqdagi neft va gaz eksportchilari 2026-yilgacha Ukrainadagi mojarodan oldingi prognozlarga qaraganda qo‘shimcha umumiy daromadga ega bo‘ladi”, — dedi XVFning Yaqin Sharq va Shimoliy Afrika departamenti direktori Jihod Azur.
Uning fikricha, bu mablag‘lar kelajak uchun, masalan, innovatsion texnologiyalar, yashil energiya va sog‘liqni saqlashga sarmoya bo‘lishi kerak.
Financial Times eslatishicha, “dunyodagi eng yirik va faol suveren jamg‘armalar” qatoriga Saudiya Arabistoni (PIF), Qatar, Quvayt va Birlashgan Arab Amirliklarining davlat jamg‘armalari kiradi.
“Bozor o‘zgaruvchanligidan foydalanish maqsadida” ular 2008—2009-yillardagi pandemiya va moliyaviy inqiroz davrida notinch G‘arb kompaniyalarining ulushlarini sotib oldi, deya qo‘shimcha qiladi nashr.
Valiahd shahzoda Muhammad bin Salmon al Saud boshchiligidagi PIF ikkinchi chorakda AQSHning Alphabet, BlackRock, Amazon, Microsoft va boshqa yetakchi kompaniyalariga “investitsiyalarni diversifikatsiya qilish uchun” 7,5 milliard dollar sarmoya kiritdi.
Saudiya Arabistoni 2013-yildan buyon ilk bor yalpi ichki mahsulotga nisbatan 5,5 foizlik byudjet profitsitini qayd etishni rejalashtirmoqda va iqtisodiy o‘sish sur’ati 7,6 foizni tashkil etishini prognoz qilmoqda.
Avvalroq Saudi Aramco’ning daromadi neft bozorida yana bir rekord o‘rnatgan edi.
Izoh (0)