Shavkat Mirziyoyevning Saudiya Arabistoniga amalga oshirgan ikki kunlik davlat tashrifi davomida ikki davlat olimlari hamkorligida qo‘shma ilmiy loyihalarni amalga oshirish, olimlarni stajirovkalarga yuborish va o‘zaro tajriba almashish masalalari bo‘yicha ham kelishib olindi. Jumladan, O‘zbekiston Saudiya Arabistonining eng yirik — Qirol Abdulaziz universiteti bilan hamkorlikni yo‘lga qo‘ydi.
Ta’kidlanishicha, Qirol Abdulaziz universiteti bilan hamkorlikda yangi markaz tashkil etish taklifi muhokama qilindi. Universitet delegatsiyasi Toshkentda oktabr oyida bo‘lib o‘tadigan InnoWeek-2022 innovatsion g‘oyalar haftaligiga tashrif buyurganida markaz tashkil etish masalasi batafsil muhokama etiladi.
Jahon universitetlaridagi ta’lim sifatlari tahlili bilan shug‘ullanuvchi World University Rangkings tashkiloti xulosasiga ko‘ra, 2022-yil Arab va Fors ko‘rfazi davlatlaridagi oliy o‘quv yurtlari o‘tgan yilga nisbatan ancha yuqori ko‘rsatkichlarni qayd etgan. Xususan, Saudiya Arabistonining Qirol Abdulaziz nomidagi universiteti Yaqin Sharq va Shimoliy Afrika mintaqalari ichida ushbu reytingda liderlik qilayotgan Quddus universitetiga yaqinlashib olgan hamda mintaqada ikkinchi o‘ringa ko‘tarilgan.
Ma’lumot o‘rnida, Qirol Abdulaziz universiteti 1967-yilda Jidda shahrida Red Sea developerlik kompaniyasi tomonidan xususiy universitet sifatida tashkil etilgan. Keyinchalik — 1974-yilda u davlat universitetiga aylantirilgan. 2021-yilda Times Higher Education dunyo universtitetlari reytingida arab universitetlari orasida birinchi o‘rinni egalladi. Universitet dunyoviy ta’limga yo‘naltirilgan. Muhandislik, iqtisod va menejment, huquq, tibbiyot va boshqa fakultetlar mavjud.
Izoh (0)