Samarqandda fermer xo‘jaligi rahbari chorvachilikni rivojlantirish uchun xorijdan olib kelingan 31 bosh naslli qoramollarni sotib yuborgani aniqlandi

Samarqand viloyatining Ishtixon tumani fermer xo‘jaligi rahbari, Toshkent viloyatining Angren shahrida MCHJ rahbari imtiyozli kredit mablag‘larini o‘zlashtirgani aniqlandi.

Bosh prokuratura huzuridagi departamentning Ishtixon tuman bo‘limi tomonidan o‘tkazilgan tergovga qadar tekshirishda, “X.e.” fermer xo‘jaligi rahbari M.J. xo‘jalikka chorvachilikni rivojlantirish va xorijdan naslli chorva mollarini sotib olish uchun ajratilgan 780 million so‘m imtiyozli kredit evaziga xorijdan olib kelingan 31 bosh naslli qoramollarni sotib yuborib, kredit mablag‘ini o‘zlashtirganligi aniqlangan.

Shu kabi, Angren shahar bo‘limi tomonidan o‘tkazilgan tergovga qadar tekshiruvda “M.O.” MCHJga baliqchilikni rivojlantirish uchun ajratilgan 490 millin so‘m imtiyozli kredit mablag‘ini MCHJ rahbari A.O‘. boshqa maqsadlarda sarflab, o‘zlashtirib yuborganligi aniqlangan.

Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.

Mavzuga doir: 

• Navoiyda fermer xo‘jaligi ish yurituvchisi 156 mln so‘m imtiyozli kreditni talon-toroj qildi
• Qashqadaryoda fermer xo‘jaligi rahbari 245 mln so‘mni talon-toroj qildi