Шавкат Мирзиёевнинг Саудия Арабистонига амалга оширган икки кунлик давлат ташрифи давомида икки давлат олимлари ҳамкорлигида қўшма илмий лойиҳаларни амалга ошириш, олимларни стажировкаларга юбориш ва ўзаро тажриба алмашиш масалалари бўйича ҳам келишиб олинди. Жумладан, Ўзбекистон Саудия Арабистонининг энг йирик — Қирол Абдулазиз университети билан ҳамкорликни йўлга қўйди.
Таъкидланишича, Қирол Абдулазиз университети билан ҳамкорликда янги марказ ташкил этиш таклифи муҳокама қилинди. Университет делегацияси Тошкентда октябрь ойида бўлиб ўтадиган InnoWeek-2022 инновацион ғоялар ҳафталигига ташриф буюрганида марказ ташкил этиш масаласи батафсил муҳокама этилади.
Жаҳон университетларидаги таълим сифатлари таҳлили билан шуғулланувчи World University Rangkings ташкилоти хулосасига кўра, 2022 йил Араб ва Форс кўрфази давлатларидаги олий ўқув юртлари ўтган йилга нисбатан анча юқори кўрсаткичларни қайд этган. Хусусан, Саудия Арабистонининг Қирол Абдулазиз номидаги университети Яқин Шарқ ва Шимолий Африка минтақалари ичида ушбу рейтингда лидерлик қилаётган Қуддус университетига яқинлашиб олган ҳамда минтақада иккинчи ўринга кўтарилган.
Маълумот ўрнида, Қирол Абдулазиз университети 1967 йилда Жидда шаҳрида Red Sea девелоперлик компанияси томонидан хусусий университет сифатида ташкил этилган. Кейинчалик — 1974 йилда у давлат университетига айлантирилган. 2021 йилда Times Higher Education дунё универститетлари рейтингида араб университетлари орасида биринчи ўринни эгаллади. Университет дунёвий таълимга йўналтирилган. Муҳандислик, иқтисод ва менежмент, ҳуқуқ, тиббиёт ва бошқа факультетлар мавжуд.
Изоҳ (0)