IT Park oyiga 1000 dollar topadigan IT mutaxassisi haqida hikoya qildi. U farg‘onalik 24 yoshli Sanjarbek Asrorov.
2017-yildan 2021-yilgacha Muhammad al-Xorazmiy nomidagi Toshkent axborot texnologiyalari universitetining Farg‘ona filialida tahsil olib, u yerda dasturiy injiniringni o‘zlashtirgan.
Talabalik paytida u veb-dasturlashni ham o‘rgangan. 2019-yilda Farg‘ona tumanida birinchilardan bo‘lib internet-do‘kon uchun saytni yaratdi va ishga tushirdi, shu tufayli hozirda yaxshigina daromad olmoqda.
2020-yil sentabr oyidan boshlab Sanjarbek Marg‘ilondagi Raqamli texnologiyalar markazida frontend va backend dasturlash yo‘nalishlarida, 2021-yil iyul oyidan boshlab IT Park Farg‘ona filiali IT-Markazida dars beradi.
Sanjarbek turli tanlov va musobaqalarda faol ishtirok etib, ba’zilarida sovrinli o‘rinlarni egallagan. Bundan tashqari, u hamfikrlar jamoasi bilan birgalikda bir qancha yirik loyihalarni, jumladan, davlat buyurtmalarini ishga tushirgan.
Dasturlashdan tashqari, u kibersport bilan ham shug‘ullanadi. “RaisBuva” YouTube kanalida milliy va xalqaro musobaqalarni yoritib boradi.
Bugungi kunda, Sanjarbek o‘zining internet-do‘koni va o‘qitish orqali oyiga taxminan 1 000 dollar daromad oladi.
Avvalroq IT Park Sirdaryoda ayollar uchun InnoWoman dasturini ishga tushirishi haqida xabar berilgandi.
Izoh (0)