Uzbekistan Airways’ni xususiylashtirish strategiyasini ishlab chiqish uchun professional konsalting kompaniyasi tanlab olinishi yuzasidan tanlov e’lon qilindi. Bu haqda Davlat aktivlarini boshqarish agentligi xabar bermoqda.
Mahalliy va xorijiy talabgorlar tijorat takliflarini joriy yil 17-sentabr kuni soat 18:00 ga qadar taqdim etishi kerak.
Agar birgalikda qo‘shma tijorat taklifi taqdim etilsa, jalb qilingan sherik-konsultantning ham ishini muvofiqlashtirish uchun mas’ul bo‘lgan va javobgarlikni zimmasiga oladigan asosiy konsultant ko‘rsatilishi lozim.
Kompaniya haqida ma’lumot
Kompaniya “O‘zbekiston havo yo‘llari” milliy aviakompaniyasining xizmat ko‘rsatish belgisi va savdo belgisining mutlaq huquqiy vorisi hisoblanadi.
Uzbekistan Airways — O‘zbekiston aviatsiya va xalqaro qoidalarining nizomiga muvofiq har qanday ko‘rinishdagi yengil va og’ir yuklarni, pochtalarni hamda yo’lovchilarni havo kemalari orqali tashish bo‘yicha xizmatlarni taqdim etadi.
Kompaniya 50 nafardan ortiq belgilangan yo’nalishlarda, jumladan Yevropa, Osiyo va Shimoliy Amerika mamlakatlariga muntazam ravishda reyslarni amalga oshiradi.
Aviakompaniyaning vakolatxonalari 20 dan ortiq dunyo shaharlarida faoliyat ko‘rsatadi.
Kompaniyaning asosiy faoliyatidan tashqari, unga tegishli Uzbekistan Airways Technics, Uzbekistan Helicopters, O‘quv-mashg‘ulot markazi va Ketring kabi tarkibiy korxonalari mavjud.
2021-yil yakuniga ko‘ra kompaniya 6,3 trln so‘m miqdoridagi sof tushumga, 53,7 mlrd so‘m miqdoridagi sof foydaga, shuningdek 4,2 trln so‘m miqdoridagi ustav kapitaliga ega.
Izoh (0)