IT Park ойига 1 000 доллар топадиган IT мутахассиси ҳақида ҳикоя қилди

IT Park ойига 1000 доллар топадиган IT мутахассиси ҳақида ҳикоя қилди. У фарғоналик 24 ёшли Санжарбек Асроров.

2017 йилдан 2021 йилгача Муҳаммад ал-Хоразмий номидаги Тошкент ахборот технологиялари университетининг Фарғона филиалида таҳсил олиб, у ерда дастурий инжинирингни ўзлаштирган.

Талабалик пайтида у веб-дастурлашни ҳам ўрганган. 2019 йилда Фарғона туманида биринчилардан бўлиб интернет-дўкон учун сайтни яратди ва ишга туширди, шу туфайли ҳозирда яхшигина даромад олмоқда.

2020 йил сентябрь ойидан бошлаб Санжарбек Марғилондаги Рақамли технологиялар марказида frontend ва backend дастурлаш йўналишларида, 2021 йил июль ойидан бошлаб IT Park Фарғона филиали IT-Марказида дарс беради.

Санжарбек турли танлов ва мусобақаларда фаол иштирок этиб, баъзиларида совринли ўринларни эгаллаган. Бундан ташқари, у ҳамфикрлар жамоаси билан биргаликда бир қанча йирик лойиҳаларни, жумладан, давлат буюртмаларини ишга туширган.

Дастурлашдан ташқари, у киберспорт билан ҳам шуғулланади. «РаисБува» YouTube каналида миллий ва халқаро мусобақаларни ёритиб боради.

Бугунги кунда, Санжарбек ўзининг интернет-дўкони ва ўқитиш орқали ойига тахминан 1 000 доллар даромад олади.

Аввалроқ IT Park Сирдарёда аёллар учун InnoWoman дастурини ишга тушириши ҳақида хабар берилганди.