O‘zbekistonda yil boshidan beri eng ko‘p IT kompaniyalar tashkil etilgan hududlar ma’lum bo‘ldi

O‘zbekistonda IT sohasida faoliyat ko‘rsatayotgan kompaniyalar soni 11,2 mingdan oshdi. Bu haqda Davlat statistika qo‘mitasi xabar bermoqda. 

Kompaniyalar o‘sish sur’ati o‘tgan yilning mos davriga nisbatan 7,5 foizni tashkil etdi.

Shuningdek, joriy yilning yetti oyida ushbu sohada 1 522 ta korxonalar yangi tashkil etilib, ularning 1 514 tasi kichik biznes subyektlari hissasiga to‘g‘ri keldi.

Eng ko‘p IT kompaniyalar tashkil etilgan hududlar orasida Toshkent shahri yetakchilik qilmoqda — 652 ta. Ikkinchi o‘rinda 141 ta korxona bilan Samarqand borayotgan bo‘lsa, Farg‘ona 109 ta ko‘rsatkich bilan uchinchi o‘rinni egallagan.  

Bundan tashqari, O‘zbekistonda chet el IT kompaniyalari soni ham keskin ortmoqda. 

2022-yil yanvar—iyul holatiga ko‘ra O‘zbekistonda yangi tashkil etilgan chet el IT kompaniyalari soni 170 ta bo‘ldi.

O‘tgan yilning shu davrida 57 ta chet el IT kompaniyalari tashkil qilingan edi. 

2021-yil yanvar—iyul oylarida O‘zbekistonda 369 ta xorijiy IT kompaniyalar faoliyat ko‘rsatayotgan edi. Joriy yilda bu ko‘rsatkich 550 taga yetdi.

2022-yil iyul oyining o‘zida 20 ta yangi xorijiy IT kompaniyalari faoliyatini boshladi. Iyun oyida esa 30 ta shunday kompaniya tashkil qilingan.