Toshkent aeroportining mahalliy va xalqaro aviaqatnov terminallari o‘rtasida avtobus qatnovi yo‘lga qo‘yildi. Bu haqda Uzbekistan Airports matbuot xizmati xabar berdi.
UzPort stikerli avtobus har kuni soat 05:00 dan 23:30 gacha xizmat ko‘rsatadi.
Biz yo‘lovchilardan terminallarni bir-biriga bog‘lash bilan bog‘liq ko‘plab murojaatlar oldik. Yo‘lovchilar ayrim hollarda terminallarda adashtirib noto‘g‘ri terminalga kelishadi — deydi Uzbekistan Airports.
Kompaniya matbuot xizmatining aytishicha, shahardagi terminallar orasi 4 kilometrni tashkil qiladi va taksidan foydalanish doim ham hamma uchun qulay bo‘lmasligi mumkin.
Ushbu vaziyatni inobatga olgan holda, Uzbekistan Airports terminallararo qatnovchi avtobusni test rejimida yo‘lga qo‘yishga qaror qildi, — deya izoh berdi kompaniya.
Terminallararo transport har soatda jadvalga muvofiq harakatlanadi.
Xalqaro aviaqatnovlar terminalida avtobus jo‘nab ketish zali yonidagi to‘xtash joyida avtobuslar uchun ajratilgan yo‘lak bo‘ylab harakatlanadi, mahalliy terminalda esa kirish eshigi yonigacha boradi.
Avtobus xizmatlaridan barcha xohlovchilar mutlaqo bepul foydalanishi mumkin.
Avvalroq O‘zbekistondagi aeroportlarning umumiy foydasi ma’lum bo‘lgan edi.
Kompaniyaning 2022-yilning birinchi yarmidagi umumiy daromadi 513,8 mlrd so‘mni tashkil etdi.
Izoh (0)