Toshkentda ko‘p qavatli uyda joylashgan do‘kon va ofisda yong‘in chiqdi (video)

Toshkentning Yashnobod tumanidagi ko‘p qavatli uyda joylashdan do‘kon va unga tutash ofisda yong‘in chiqdi. Bu haqda FVV matbuot xizmati xabar berdi.

Ma’lum qilinishicha, 18-avgust kuni tumanning “Vatandosh” MFY Tuzel 2-dahasida joylashgan ko‘p qavatli uyning 1-qavatida atir-upa savdo do‘koni va unga tutash 2 ta MChJ ofisida yong‘in yuz bergani haqida soat 01:57 da xabar berilgan.

Yong‘inni bartaraf etishga 4 ta yong‘in-qutqaruv ekipaji va 1 ta avtonarvon jalb etilgan. Ekipajlar hodisa joyiga soat 01:59 da yetib borgan va yong‘in soat 02:10 da o‘chirilgan.

Hodisa oqibatida savdo do‘konining 35 kvadrat metr, unga tutash 2 ta MChJning 15 kvadrat metr maydonda ofis uchun mo‘ljallangan xona jihozlari yonib zararlangan.

Qutqaruvchilarning tezkor harakatlari natijasida savdo do‘konining 60 kvadrat metr maydoni, MChJlarning 90 kvadrat metr maydoni yong‘indan saqlab qolingan.

Yong‘in oqibatida tan jarohati olgan halok bo‘lganlar yo‘q. Hozirda yong‘inning kelib chiqish sababi va keltirilgan moddiy zarar miqdori aniqlanmoqda.

Bundan avval Toshkentning Mirzo Ulug‘bek tumanidagi ko‘p qavatli uyda yong‘in sodir bo‘lgani haqida xabar berilgan edi.