Rossiya harbiylari Xarkovning Saltovka tumanidagi ko‘p qavatli uyga raketa hujumi uyushtirdi. Bu haqda Xarkov viloyati harbiy boshqarmasi rahbari Oleg Sinegubovga tayanib, Meduza xabar berdi.
Hujumdan so‘ng binoda yong‘in boshlangan. Sinegubovning aytishicha, bino butunlay vayron bo‘lgan. Uning so‘zlariga ko‘ra, zarbalar oqibatida olti kishi halok bo‘lgan, yana 16 kishi yaralangan. Keyinchalik qurbonlar soni yetti nafarga yetgani xabar qilindi.
Shahar meri Igor Terexov hujumni qattiq qoraladi. “Bu harbiy nishon emas. Bu qo‘rqitish harakati, genotsid, bu haqiqiy fashizm”, — dedi u.
Ukraina prezidenti Vladimir Zelenskiy o‘qqa tutilgan binoda yotoqxona borligini aytdi. U bu hodisani “tinch aholiga nisbatan hech qanday asosga ega bo‘lmagan razillik va beadab hujum”, deb atadi.
Xarkov rasmiylariga ko‘ra, yotoqxonada 30 dan ortiq odam, jumladan, pensionerlar va bolalar yashagan.
Rossiya Mudofaa vazirligi hujumga izoh bermadi.
Izoh (0)