AQSH va bir nechta Yevropa mamlakatlari Ukrainadagi vaziyat tufayli BMT Xavfsizlik kengashi majlisini o‘tkazish uchun so‘rov yubordi, deb yozadi “RBK”.
“RIA Novosti” ma’lumotlariga ko‘ra, so‘rovga AQSHdan tashqari, Fransiya, Buyuk Britaniya (ular Xavfsizlik kengashining doimiy a’zolari), shuningdek, Irlandiya, Norvegiya, Albaniya (doimiy bo‘lmagan a’zolar) qo‘shilgan. Yig‘ilish 24-avgustda o‘tkazilishi so‘ralgan.
“TASS” manbasi aniqlik kiritishicha, boshqa masalalar bilan bir qatorda BMT bosh kotibi Antoniu Guterrishning Ukrainaga tashrifi yakunlari muhokama qilinadi. U 17-avgust, chorshanba kuni Lvovga borgandi. Guterrish Ukraina prezidenti Vladimir Zelenskiy va Turkiya prezidenti Rajab Toyyib Erdo‘g‘on bilan uch tomonlama muzokaralar o‘tkazishni rejalashtirgan. Bundan tashqari, bosh kotib don bo‘yicha kelishuvda ishtirok etayotgan uchta portdan biriga bormoqchi.
Rossiya Ukrainada operatsiya boshlaganidan keyin BMT Xavfsizlik kengashi G‘arbning talabi bilan ham, Rossiyaning talabi bilan ham bir necha marta yig‘ilishlar o‘tkazgan. Iyun oxirida majlislardan birida Zelenskiy Rossiya Xavfsizlik kengashi a’zosi bo‘lib qolishga haqi yo‘qligini aytib, BMT Bosh assambleyasida Rossiya delegatsiyasini vakolatlaridan mahrum qilishga chaqirgan edi. Ammo tashkilot nizomida Xavfsizlik kengashidan doimiy a’zoni chiqarib tashlash ko‘zda tutilmagan.
Shundan keyin Bosh assambleya 67-sessiyasi raisi vakili Polina Kubiak mamlakatni assambleyadan chiqarish haqidagi qaror faqat BMT Xavfsizlik kengashi tomonidan qabul qilinishini eslatdi.
10-avgust kuni Rossiya Zaporojye AESning o‘qqa tutilishi tufayli Xavfsizlik kengashi majlisini chaqirishni talab qilgandi. 11-avgust kuni bo‘lib o‘tgan sessiyada Rossiyaning BMT huzuridagi doimiy vakili Vasiliy Nebenzya hujumlarda rossiyalik harbiylarning ayblanishi bema’nilik ekanini aytdi.
Xalqaro atom energiyasi agentligi (MAGATE) bosh direktori Rafael Mariano Grossi majlisda qatnashib, AESga nisbatan olib borilayotgan harbiy harakatlar istalgan vaqtda yadroviy halokatga olib kelishi haqida ogohlantirdi. U ushbu vaziyatni o‘ta xavotirli deb atadi.
Izoh (0)