Kanada Ukrainaga qish mavsumi oldidan yonilg‘i sotib olish uchun 450 million Kanada dollari (348,6 million dollar) miqdorida kredit beradi. Bu haqda Kanada hukumati saytida xabar qilingan.
“Ukrainaga qish mavsumi oldidan isitish uchun yonilg‘i sotib olishga yordam beradigan 450 million dollar kredit ajratilishini hisobga olib, biz shu kungacha o‘z zimmamizga olgan barcha kredit majburiyatlarimizni bajardik”, — deya Kanada bosh vaziri o‘rinbosari va moliya vaziri Xristi Frilandning so‘zlari keltirilgan xabarda.
Ushbu summa bilan birga Kanadaning yil boshidan beri Kiyevga ajratgan kreditlari umumiy hajmi 1,95 milliard Kanada dollariga (1,51 milliard dollar) yetadi. Umuman olganda, Kanada Ukrainaga 3,4 milliard Kanada dollari (2,63 milliard dollar) miqdorida yordam ko‘rsatdi.
Ukraina gaz sotib olish uchun Kanadadan 12,7 mlrd grivna (350 mln dollar) qarz olishni rejalashtirayotgani haqida o‘tgan hafta Oliy Rada deputati Yaroslav Jeleznyak xabar bergan edi. Unga ko‘ra, kredit 1,6 foiz bilan o‘n yilga mo‘ljallangan.
Mavzuga doir: Kanada mudofaa vaziri mamlakatda 33 mingdan ortiq ukrainalik askarni tayyorlaganini aytdi
Izoh (0)