Rossiya Qora dengiz floti qo‘mondoni o‘zgardi, deb yozadi Meduza. Bu haqda “RIA Novosti Qrim” flotdagi manbalariga tayanib xabar bergan.
Yangi qo‘mondon — vitse-admiral Viktor Sokolov harbiy kengash a’zolariga tanishtirildi, dedi agentlik suhbatdoshlari, ularning qo‘shimcha qilishicha, bosh qo‘mondon uni lavozimga tayinlash haqida buyruq chiqargan.
“Ommaviy tadbir bo‘lgani yo‘q va, katta ehtimol bilan, bo‘lmasa ham kerak, chunki shaharda terrorchilik xavfining sariq darajasi joriy qilingan”, — dedi ular.
Vaziyat bilan hamda shaxsan Viktor Sokolov bilan tanish bo‘lgan agentlikning yana bir manbasi aytishicha, “maxsus harbiy operatsiya borayotgan” bir sharoitda hech kim bunday tayinlovlar haqida ommaga e’lon qilishga majbur emas — bu normal holat. Sokolov, uning so‘zlariga ko‘ra, hozir “ishlarni qabul qilib olmoqda”.
Rossiya Qora dengiz flotining rasmiy vakillari qo‘mondon almashgani haqidagi xabarlarga izoh berganicha yo‘q. Prezidentning flotga yangi qo‘mondon tayinlash haqidagi buyrug‘i ochiq manbalarga joylashtirilgani yo‘q.
Agar Viktor Sokolovning tayinlangani haqidagi ma’lumot tasdiqlansa, u Rossiya Qora dengiz floti qo‘mondoni lavozimida Igor Osipovning o‘rnini egallagan bo‘ladi.
Osipov 2019-yil martida Rossiya prezidenti farmoni bilan Qora dengiz floti qo‘mondoni etib tayinlangan edi.
2022-yil aprelida “Moskva” kreyseri halokatga uchraganidan keyin Ukraina OAVlarida Osipov surishtiruv olib borilayotgan paytda lavozimidan chetlatilgani va hatto hibsga olingani haqidagi ma’lumotlar paydo bo‘lgan edi. Ushbu versiya tarafdorlari qayd etishicha, Qora dengiz floti qo‘mondoni may oyida Sevastopolda G‘alaba kuni Qora dengiz floti kuni sharafiga uyushtirilgan bayram tantanalarida qatnashmagan. Ammo 19-iyun kuni Osipov ommaga ko‘rinish bergan: Sevastopoldagi Naximov bilim yurtidagi bitiruv marosimiga kelgan.
Izoh (0)