Xitoy Xalq ozodlik armiyasi Hindiston, Belarus, Mongoliya, Tojikiston va boshqa mamlakatlar bilan bir qatorda “Vostok-2022” strategik harbiy o‘quv mashg‘ulotlarida qatnashadi. Bu haqda XXR Mudofaa vazirligi ma’lum qildi, deb yozadi Meduza.
Xitoyning qo‘shma mashg‘ulotlarda qatnashishi “joriy xalqaro va mintaqaviy vaziyat bilan bog‘liq emas”, balki Rossiya bilan hamkorlik haqidagi ikki tomonlama kelishuvning bir qismi hisoblanadi, deyiladi Xitoy Mudofaa vazirligi xabarida.
Iyul oyida Rossiya Mudofaa vazirligi 30-avgustdan 5-sentabrga qadar urush boshlanganidan buyon birinchi marta “Vostok-2022” keng ko‘lamli strategik mashg‘ulotlar o‘tkazishini e’lon qilgan edi. Rossiya idorasi Sharqiy harbiy okrugdagi mashqlarda shu jumladan, “boshqa davlatlar harbiy kontingentlari” ham ishtirok etishini ta’kidlagan, biroq aynan qaysi davlatlar ekaniga aniqlik kiritmagan edi.
Bunday harbiy mashg‘ulotlarning so‘nggisi 2018-yilda bo‘lib o‘tgan. O‘shanda Xitoy birinchi marta qatnashgan edi.
AQSH Davlat departamenti vakili Ned Prays brifing chog‘ida Xitoy Rossiya hududidagi “Vostok-2022” harbiy o‘quv mashqlarida qatnashishi haqidagi ma’lumotni izohladi. Uning aytishicha, qo‘shma mashg‘ulotlar o‘tkazish — Rossiya va Xitoyning suveren qarorlari.
“Tushunishimcha, bu Rossiya va Xitoydan tashqari bir qator mamlakatlar qatnashadigan qo‘shma mashg‘ulotlar. Mamlakatlar muntazam ravishda o‘z suveren qarorlarini qabul qiladi. Bu ularning mutlaq huquqi”, — dedi u.
Shuningdek, Prays ma’lum qilishicha, AQSH Ukrainadagi maxsus operatsiyalar yuzasidan Xitoy tomonidan Rossiyaga harbiy yordam berilishi belgilarini ko‘rmagan. XXR, uning aytishicha, Rossiyaga G‘arb sanksiyalarini aylanib o‘tishda yordamlashgani yo‘q.
Izoh (0)