НАТО раҳбари Йенс Столтенберг альянс шимолий Косоводаги иштирокини оширганини маълум қилди. У бу ҳақда Белград ва Приштина ўртасидаги музокаралар олдидан айтиб ўтди, деб ёзади Deutsche Welle.
Альянс раҳбари Брюсселда Косово бош вазири Албин Курти ва Сербия президенти Александр Вучич билан учрашган. Қўшма матбуот анжуманида у НАТО қўшимча кучларни Косовога жойлаштиришга тайёрлигини ва республикадаги иштирокини аллақачон оширганини айтди.
«Биз ҳозир муҳим вазифани бажармоқдамиз. Косоводаги ҳарбий иштирокимиз 4000 аскарга яқинлашмоқда. Барқарорлик таҳдид остида қолса, НАТОнинг Косоводаги тинчликпарвар кучлари (KFOR) вазиятга аралашишга тайёр. Улар Косово аҳолиси учун хавфсиз муҳит ва ҳаракат эркинлигини таъминлашда зарур бўлган барча чораларни кўради», — деди НАТО раҳбари.
Бундан ташқари, Столтенберг барча томонларни вазминликка ва зўравонликдан қочишга чақирди.
«Жойдаги вазият яхшиланган бўлса-да, қайта кескинлашувга йўл қўймаслик барча томонларнинг, хусусан, Белград ва Приштина расмийларининг зиммасида. Бизнинг KFOR тинчликпарвар миссиямиз ўзининг БМТ мандатига эътибор қаратишда давом этмоқда», — дея қўшимча қилди у.
Вучич эса Косово бош вазири билан қийин музокаралар кутаётганини билдирди, чунки Ғарбий Болқондаги ушбу икки қўшни давлат барча масалада ҳамфикр эмас. Лекин унинг айтишича, тинчлик ва барқарорлик ҳаммасидан муҳим.
«Эртага бизни қийин мунозаралар кутмоқда. Деярли ҳеч нарса бўйича келишиб олганимиз йўқ. Бизнинг тарихимиз осон кечмаган. НАТО ҳам, биз ҳам ҳар қандай кескинлашув ёки можаро эҳтимолидан қочиш тарафдоримиз», — деди Вучич.
Аввалроқ Косово бош вазири янги можаро юзага келиши мумкинлиги ҳақида огоҳлантирган эди.
Эслатиб ўтамиз, Сербия ва Косово ўртасидаги таранглик август ойи бошида яна кучайди. Сербия президенти Александр Вучич Косово полицияси ярим тунда республикадаги сербларга қарши ҳарбий операция бошлаганини даъво қилди. 1 августдан бошлаб Сербия ҳужжатлари Косовода ўз кучини йўқотиши керак эди.
Бир мунча вақт ўтгач, Косово республикасининг асосан, серблар яшайдиган шимолий ҳудудларида ҳаво ҳужуми сиреналари ишга туширилгани ва аҳоли баррикадалар қура бошлагани ҳақида маълумот пайдо бўлди. Кейинчалик Косово ҳукумати Европа Иттифоқи ва АҚШ элчилари билан маслаҳатлашганидан сўнг Сербия ҳужжатларига тақиқ қўйиш тартибини 1 сентябрга қолдирди.
Маълумот учун, Косово 2008 йилда Сербия таркибидан чиқиб, ўз мустақиллигини эълон қилган. Сербия ҳалигача республика мустақиллигини тан олмайди. Косовони 116 давлат, жумладан АҚШ ва Европа Иттифоқининг аксарият давлатлари тан олган.
Изоҳ (0)