Ijtimoiy tarmoqlarda “Bag‘dodda nima gaplar?” sarlavhali xabar tarqalgandi. Farg‘ona viloyati ichki ishlar boshqarmasi tomonidan holat o‘rganib chiqildi.
Ma’lum bo‘lishicha, 17-avgust kuni fuqaro X.A. o‘ziga tegishli bo‘lgan, Bag‘dod tumani “Mirzabod” MFY hududida joylashgan go‘sht do‘koni oldida fuqarolar A.T. va Sh.T. bilan o‘zaro gap talashib, janjallashib ketgan. Janjal davomida X.A. A.T. va Sh.T.ga go‘sht do‘konidan olgan pichoq bilan tan jarohati yetkazgan.
Tuman tibbiyot bo‘limining dastlabki ma’lumotiga ko‘ra, Sh.T. yetkazilgan og‘ir tan jarohati oqibatida tibbiyot bo‘limida vafot etgan. Fuqaro A.T. yengil tan jarohati olib, shifoxonada davolanmoqda.
Hozirda mazkur holat yuzasidan Bag‘dod tumani IIB huzuridagi tergov bo‘linmasi tomonidan Jinoyat kodeksining 104-moddasi (qasddan badanga og‘ir shikast yetkazish) 3-qismi “d” bandi bilan jinoyat ishi qo‘zg‘atilib, tergov harakatlari olib borilmoqda. Gumondor shaxs ushlangan.
Izoh (0)