Ukrainada rus tili va rus adabiyoti maktab dasturidan olib tashlandi. Tarix bo‘yicha kursga esa “rashizm” tushunchasi kiritildi

Ukraina Ta’lim va fan vazirligi chet el adabiyoti bo‘yicha maktab dasturidan Rossiya va Belarus yozuvchilari asarlari olib tashlanganini ma’lum qildi, deb yozadi Meduza.

Buning o‘rniga maktab dasturiga boshqa chet ellik mualliflar asarlari kiritilgan. Xususan, u yerdan O. Genri, Jan de Lafonten, Anna Gavalda, Ulf Stark va boshqalarning asarlari joy oldi.

Muassasa qayd etishicha, “Chet el adabiyoti” maktab kursida “rus tilida ijod qilgan, ammo hayoti va ijodi Ukraina bilan chambarchas bog‘liq bo‘lgan yozuvchilarning asarlari” qoldirilgan. Bular Nikolay Gogol, Vladimir Korolenko, Mixail Bulgakov (faqat “Ityurak”). Qo‘shimcha o‘qish uchun ro‘yxatda Ilya Ilf va Yevgeniy Petrovning “O‘n ikki stul” hamda Anatoliy Kuznetsovning “Babiy Yar” kitoblari qoldirildi. Shuningdek, maktab dasturida qrim-tatar yozuvchisi Tair Xalilovning asarlari ham qoldi.

Bundan tashqari, “istoriografiyaga oid yangi materiallarni hisobga olgan holda” “Ukraina tarixi” va “Jahon tarixi” o‘quv dasturlariga o‘zgarishlar kiritildi. Yangilangan dasturlarda SSSR “imperiya turidagi hokimiyat” deb atalgan, alohida o‘quv blokiga Rossiyaning 2014-yilda boshlangan Ukrainaga qarshi harbiy tajovuzi kiritildi. Bundan tashqari, o‘quv dasturlarida tushunchalar ro‘yxati yangilandi, unga “rus dunyosi” va “rashizm” kiritildi.

“Ta’lim jarayonida foydalanish tavsiya etilgan dasturlar ro‘yxatidan ‘Adabiyot (rus va chet el)’, 5—9-sinflar uchun ‘Rus tili (rus tilida o‘qitiladigan umumta’lim o‘quv muassasalari uchun)’, 10—11-sinflar uchun ‘Rus tili va adabiyoti (rus tilida o‘qitiladigan o‘quv muassasalari uchun integratsiyalangan kurs)’ dasturlari olib tashlandi”, — deyiladi vazirlik xabarida.

Ukraina hukumati o‘quv dasturlarini “Rossiyaning Ukrainaga qarshi keng ko‘lamli qurolli tajovuzi tufayli yuzaga kelgan chaqiriqlarga javoban” ko‘rib chiqdi, deya ma’lum qildi ta’lim vazirligi.

Iyun oyida Ukraina ta’lim vaziri Andrey Vitrenko chet el adabiyoti dasturidan Rossiya armiyasini “madh qiluvchi” barcha asarlar, masalan, Lev Tolstoyning “Urush va tinchlik” romani chiqarib tashlanishini aytgandi.