Украина Таълим ва фан вазирлиги чет эл адабиёти бўйича мактаб дастуридан Россия ва Беларусь ёзувчилари асарлари олиб ташланганини маълум қилди, деб ёзади Meduza.
Бунинг ўрнига мактаб дастурига бошқа чет эллик муаллифлар асарлари киритилган. Хусусан, у ердан О. Генри, Жан де Лафонтен, Анна Гавалда, Улф Старк ва бошқаларнинг асарлари жой олди.
Муассаса қайд этишича, «Чет эл адабиёти» мактаб курсида «рус тилида ижод қилган, аммо ҳаёти ва ижоди Украина билан чамбарчас боғлиқ бўлган ёзувчиларнинг асарлари» қолдирилган. Булар Николай Гогол, Владимир Короленко, Михаил Булгаков (фақат «Итюрак»). Қўшимча ўқиш учун рўйхатда Иля Илф ва Евгений Петровнинг «Ўн икки стул» ҳамда Анатолий Кузнецовнинг «Бабий Яр» китоблари қолдирилди. Шунингдек, мактаб дастурида қрим-татар ёзувчиси Таир Халиловнинг асарлари ҳам қолди.
Бундан ташқари, «историографияга оид янги материалларни ҳисобга олган ҳолда» «Украина тарихи» ва «Жаҳон тарихи» ўқув дастурларига ўзгаришлар киритилди. Янгиланган дастурларда СССР «империя туридаги ҳокимият» деб аталган, алоҳида ўқув блокига Россиянинг 2014 йилда бошланган Украинага қарши ҳарбий тажовузи киритилди. Бундан ташқари, ўқув дастурларида тушунчалар рўйхати янгиланди, унга «рус дунёси» ва «рашизм» киритилди.
«Таълим жараёнида фойдаланиш тавсия этилган дастурлар рўйхатидан ‘Адабиёт (рус ва чет эл)’, 5—9-синфлар учун ‘Рус тили (рус тилида ўқитиладиган умумтаълим ўқув муассасалари учун)’, 10—11-синфлар учун ‘Рус тили ва адабиёти (рус тилида ўқитиладиган ўқув муассасалари учун интеграцияланган курс)’ дастурлари олиб ташланди», — дейилади вазирлик хабарида.
Украина ҳукумати ўқув дастурларини «Россиянинг Украинага қарши кенг кўламли қуролли тажовузи туфайли юзага келган чақириқларга жавобан» кўриб чиқди, дея маълум қилди таълим вазирлиги.
Июнь ойида Украина таълим вазири Андрей Витренко чет эл адабиёти дастуридан Россия армиясини «мадҳ қилувчи» барча асарлар, масалан, Лев Толстойнинг «Уруш ва тинчлик» романи чиқариб ташланишини айтганди.
Изоҳ (0)