Myanma davlat maslahatchisi, 77 yoshli Aung San Su Chji to‘rt holatda korrupsiyada ayblanib, olti yillik qamoq jazosiga hukm qilindi. U Do Khin Chji jamg‘armasi mablag‘larini o‘zlashtirganlikda aybdor deb topilgan. Ma’lum bo‘lishicha, sobiq maslahatchi sog‘liqni saqlash va ta’limni qo‘llab-quvvatlash uchun o‘zi tashkil etgan tashkilot mablag‘larini uy qurish va davlat yerlarini imtiyozli stavkada ijaraga olish uchun ishlatgan. Bu haqda Reuters xabar bermoqda.
Umuman olganda, Aun San Su Chji poraxo‘rlikdan tortib saylovlardagi firibgarlikkacha bo‘lgan kamida 18 ta jinoyatda ayblangan. Biroq sobiq davlat maslahatchisi ayblovlarni absurd deb atadi va o‘z aybini rad etdi.
2021-yil dekabrda Myanma sudi Aung San Su Chjini armiyadagi kelishmovchilikni qo‘zg‘atgani uchun to‘rt yilga, yanvarda esa koronavirus cheklovlarini buzgani uchun yana ikki yillik qamoq jazosiga hukm qildi. Aprel oyida esa u poraxo‘rlikda ayblanib, besh yillik qamoq jazosiga hukm qilingan. 23-aprel kuni Aun San Su Chji uy qamog‘ida bo‘lganidan so‘ng Neypido qamoqxonasidagi bir kishilik kameraga o‘tkazilgan.
Aun San Su Chji 2016-yildan 2021-yilgacha Myanma fuqarolik hukumatiga rahbarlik qilgan. Hokimiyatga kelishidan oldin u harbiy diktaturaga qarshi kurashning ramzi bo‘lib, bu uchun Nobel tinchlik mukofotini olgan.
2021-yil 1-fevralda harbiylar Myanmada davlat to‘ntarishini amalga oshirdi va mamlakat fuqarolik rahbariyati hibsga olindi. Xunta Aun San Su Chini 11 kg oltin va 600 ming dollar pora olganlikda aybladi. BMT ma’lumotlariga ko‘ra, o‘shanda mamlakatdagi namoyishlar chog‘ida kamida 70 kishi halok bo‘lgan.
Izoh (0)