Xitoy Rossiyaning Ukrainada urush boshlash rejasini bilmaganini, agar xabardor bo‘lganida uning oldini olishga urinib ko‘rgan bo‘lishini ma’lum qildi. Bu haqda Xitoyning AQShdagi elchisi Sin Gan Washington Post gazetasiga yozgan maqolasida ta’kidlagan.
Elchining yozishicha, ushbu urushdan Xitoyga foyda yo‘q.
“Ruxsat bersangiz shuni ma’lum qilmoqchimanki, Xitoy bu urushni bilgan, unga rozi bo‘lgan yoki jim turib qo‘llab-quvvatlagan degan da’volar yolg‘on xabarlardir. Mazkur bayonotlarning barchasi Xitoyga aybni yuklash va uni balchiqqa belashga xizmat qiladi”, — deydi Sin Gan.
Uning ta’kidlashicha, Xitoy ham Rossiya, ham Ukrainaning yirik savdo sherigi, shuningdek, dunyoda eng yirik neft va tabiiy gaz importchisi hisoblanadi. Elchining qo‘shimcha qilishicha, Ukrainaga hujum uyushtirilgan vaqtda u yerda 6 mingdan ortiq Xitoy fuqarosi bo‘lgan.
“Rossiya va Ukraina o‘rtasidagi mojaro Xitoyning foydasiga xizmat qilmayapti. Agarda Xitoy muqarrar inqirozdan xabardor bo‘lganida, uning oldini olish uchun barcha imkoniyatini ishga solgan bo‘lardi”, — deya ta’kidlaydi Sin Gan.
Xitoylik diplomatning so‘zlariga ko‘ra, barcha davlatlarning, jumladan, Ukrainaning ham suvereniteti va hududiy yaxlitligi hurmat qilinishi kerak. “Ukrainaga nisbatan Xitoyning pozitsiyasi xolis va betaraf: BMT nizomidagi tamoyillarga to‘liq rioya qilinishi lozim”, — deydi u.
Shu bilan birga, elchi Tayvan va Ukrainani o‘zaro bog‘lamaslikka chaqirgan.
“Ukraina — suveren davlat, Tayvan — Xitoy hududining ajralmas qismi. Tayvan masalasi — bu Xitoyning ichki ishi”, — deya ma’lum qiladi Sin Gan. U Xitoy Ukrainada tinchlik o‘rtanish tarafdori ekanini va “imkoniyati doirasida barcha yordamni ko‘rsatishga tayyorligini” bildirgan.
Elchi Xitoyning yakuniy maqsadi urushni tugatish hamda mintaqa va dunyoda tinchlikni qo‘llab-quvvatlash ekanini ta’kidlagan.
Avval Xitoy AQShdan Tayvanga qurol-yarog‘ yetkazib berishni to‘xtatishni talab qilgani va AQShni Tayvan mustaqilligini rag‘batlantirish harbiy ziddiyatga olib kelishi haqida ogohlantirgani haqida xabarlar berilgan. Xitoy xalq-ozodlik armiyasi 14-mart kuni Tayvan sohillariga harbiy havo kuchlarining 13 ta samolyotini yo‘naltirdi. Samolyotlar orol shimolidagi Taoyuan shahridagi harbiy zaxira askarlari o‘quv mashg‘ulotlarini o‘tkazayotgan hudud ustidan uchib o‘tgan.